نۊسراوێک دێرین له فرانتس کافکا / هه‌ڵگه‌ردان: پدارم ئه‌سه‌دی
هانە دیارە مەکێ ک ئەڕان بەرگیری ئەژ ڤڵاتمان سەرسؤکی فرەێ ئەنجام گیریاس. ئیمە تا ئیسکە هەمیەتێ ڤەی جەریانە نیاشتیمنە و سەرمان ڤە کەسب کارمان گەرم بییە، ئەمان ڕووداوەل ڤەردەست دڵ نگەرانمان کردێە.
من ڤە مەیدان ڕۊەڕۊ کاخ ئمپراتوری، کارگا کەفاشیم هەس. ڤە تەریک ڕووشنا دەم شؤەکی، هالیپا دەر دوکان ڤازم نەکردێە ک دەرگا گشت کۊچەل ڤەرێ مەیدان، پڕ ئەژ ئایم تفەنگە دەسە مؤینم. ئەمان یانە سەربازەل ئیمە نین، بەشکەم هانە ک دیارە چادرنیشنەلێکن ک ئەژ سەرزەمینەل شوماڵی، ڤە تەرزێ ک فام کردنێ ئەڕانم خەیاڵە، تا پایتەخت، پایتەختێ ک تا مەرز دۊرینێک فرەی دێرێ تۊنستنە ڕێ ڤازا کەن.
هەر جوورێ! ئیسکە ک هانە ئێرە، هانەیش ک دیارە هەر ڕووژ شمارەیان فرە ترا ماو.
ڤە بوونە خەسڵەت و ئاو گڵێان ڤەنام دەیشت و دەر چادرە مەن، چوون ئەژ ماڵ و خانێگ بێزارن. ڤەختێان ڤەگەرد دەم شمشێر و توک تیر تێژ کردن و تەمرین سوارکاری مەنە سەر. ڤەی مەیدان ئارامە ک هەمیشە ڤە ترسم لەرزم تەمیزە مەکریا، تەۊلە شەش دانگێ سازینە.
هەڵبەت ئیمە ڤەخت و ناڤەخت تەخەلا مەکەیمن ئەژ دوکانەلمان بچیمنە دەیشت و لانەکەم گەنترین گەنگوتاڵەل پاکا کەیمن، ئەمان ئی کارە ڕووژ ڤە ڕووژ کەمتر ئەنجامە مەگرێ، چوون رەنج بێڤەرە، جیا ڤە یە ئی مەترسیە هەس ک بکؤیمە ژێر سم ئەسبەل یا ڤە زەرب شەلاخ زامدار بۊمن.
نماو ڤەگەرد ئی چادرنیشێنەلە قسە کرد. زوان ئیمە هالیان نماو. ئەسڵەن وژیانیش زوان تایبەتێ نەێرن.جوور بەچکە قڵا قسەلێانە یەکا هالیە مەکەن. ئی دەنگ قاڕە قاڕە هەمیشە بەرزە. ڕێوڕەسم ژیان ئیمە و ئەوان ئەڕا هەر دولا نافام و ئەڵاجؤیە. ڤە بوونە یەسە ک خوەش ڤە زوان ئشارەیش نەێرن.
چناکە وژت ئەر جاکەن کەین و دەست وژت ئەژ جومگە جیا کەینا، هەمباز مؤینین ک قسەت هالی نؤینە و هەرگزیش هالی نمؤین. فرەجار دەم پاسکانییە مەکەن، ئە ڤەختەسە ک مؤینین سفیدی چەمەلێان جاوەجا ماوا و کەف لێر ئەژ دەمێان ڕێ مەگرێ ڤەر، ئەمان ڤەگەرد ئە کارەلە، نە مەیتن چێی بووشن نە کەسێ بترسنن، زاتێان هانەسە.
هەر چێ دڵێان بەیتێ هیزەمەن. نماو بووشین زوورکاریە مەکەن. دەست ک دوڕە مەکەن گشت کەسێ مەچێە لا و گشت چێە مەیلێە ئێختیارێان.
ڤە ئەنبارە وژم تا ئیسکە چێەل تاکێ هاوردێنەسە چنگ. ئەمان ئەڕا نموونە، هەنێ مؤینم قەساوە ئە پەڕ مەیدان چێ ڕووژگارێ دێرێ جا گلەی کردن ئەڕا من نییە.
هالیپا بار ناوردێەسە نام دوکان ک مؤینین کول بارە چەپاو کردن و سولەجای کردن.ئەسبێلەیانیش گووشتە مێەرن، فرە پێش هەتێیە ک سوارێ ڤە لادەست ئەسبێ درێژ کیشاسێ، هەرکامێان یەک سەر لەتە گووشتێ گردێەسە دنان و ڤەگەرد یەکا مێەرن. گووشت فرووش زەڵەێە مەچوو و زات نمەکەێ گووشت نێە بنان. ئیمە ک ئاگادار جەریان هەیمن پۊلە مەنیمنە بان یەک و یارمەتیێە مەکەیمن. ئاخر ئەگەر چادرنیشێنەل گووشت نەکؤیە گیران دیار نیە چێ خەیاڵەلێ بێە سەرێان.
ئی ئاخرەلە قەساو گومانە مەکرد لانەکەم مەتۊنێ خەفەت هەس پوس کردن نێە وژێ، و شؤیەکی ک بی کەڵەگا زنێک هاوردە دوکان. دی هۊچ ڤەخت نەبایست ئی کارە دووارە بکێ. ئەگەر هەڵە نەکەم، من یەک ساتێ تەمام ڤە ئاخر کارگاکەم تەخت ڤە بان زەمین درێژا کیشاویم و کول دڵنگ و لاف و باڵشتەل تەپانۊمە بان سەرم تا غوڕە غور گاکە نەشنؤیم ک چادرنیشێنەل ڤە هەرلا، ڕشیاۊنە سەرێ تا ڤە دنان لەتێ ئەژ گووشت گەرمێ دڕدڕا بکەن. من تا قەێرێ دوما یەکێ قاڵ و قۊ ڤەتۊ، هالیپا جؤرەت نمەکردم بچمە دەیشت، شەکەت، هەقاتی سێ مەسەل دؤر خومە شێراو، ڤە بڵنگ پاشمەنەل لێخەروو گا کەتۊنە لا. هەر ڤەی ڤەختە بی ک گومانە مەکەم ئمپراتور ڤە پشت یەکێ ئەژ پەنجەرەل کاخ دیما، ڤە هاڵەتەل تر هەرگز ڤەرێ ئووتاخەل دەیشتین کاخ نمای، هەمیشە ئێ نامینترین باخێ کاخ ڕووژ ڤە سەرە مەکێ. ئەمان ئی گلە، لانەکەم ڤە چەم من هانە مات، پشت یەکێ ئەژ پەنجەرەل ڤساوی، سەر هایشتۊیە وار و بخڵمە نوا کاخەێ تاماشا مەکرد.
ئیمە گشت ئەژ وژمانە مەپرسیمن: سەرئەنجام ماوە چە؟ ئی زۊخ و عەزاوە تا کەێ بایست ڤە گیان کیشا؟ کاخ ئمپراتوری، چادرنیشێنەل کیشاسە ئێرە ئەمان نمەزانێ چۊ بایست بتاڕنتێان.
دەروازەل هەر ئە جوورە بەسیانە، پاسەوانەل ک ئەسکە هەميشە ڤە جەبەرووت و جەڵاڵ دەیشت و نام کاخە مەکردن، ئەژ پشت پەنجەرەل میلەدار جم نمەرن. نەجات میلکان سپاردنەسە ئیمە پیشەوەرەل و کاسبەل، ئەمان ئیمە ئەڕان هانە ئەرکێ نەسازریامنە، هەرگزیش ئێدا تاوانایی ئەنجامێ نیاشتیمنە. گەن هالی بینێ هەسە ئی نامدووڵەکانە ک نابوودمانە مەکێ.
انتشار در ه‌فته نامه صدای آزادی / شماره 686