چەنشەمە؟ چیرووکێگ له مه‌سعوود قه‌نبه‌ری
ئەک کاوڵ شەڕێ بکەێ…لەێ واران خەڕگ و هفار گەرما…چەو چەو مەۊنە…! کەس کەس مەناسە…! لەشم بۊە ئاو… یە سەموومە…دێر چێم…فرە دێرە…مەردم گشتێ هاتنە…گوزەیشتێیە..بیلا پاکەتێ شرینی بسێنم…کوڕە خوەشێ لە نان برنجی تێ…هە لە مناڵییا خوەشێ هات…دکانەیل گشتێ بەسانە.. ئڕا دکان بازار زۊە…چمان ئاگر وارێ… کوڵیام…دڵنگەیلەگە چەوسیانە لەشمەو…نییە…دکان واز نییە کی وەێ گەرم نیمەرووە دکان واز کەێ؟
باێەس شەوەکی بسێنیام…وە دەس پەتی چۊ بچم؟ مەردم خراو دەنە پیم…هە کوڕە نیەۊشێ داڵگە هازد بڕیاس پاکەتێ شرینی وەلا بارید؟ ت خو زانید م چەنێ نان برنجی دووس دێرم…هە لە مناڵییا خوەشی لە چشتەیل شرین هات..خەنس و وەت داڵگە! م دووس شرین دێرم…شرین ئڕام بخوازن…مناڵۊ دەمچەوێ تەپ تەپ جووش دا…بردمەێ دگدڕ، وەت هن شرینییە…چشتەیل فرە شرین نەبایەس بخوەێد نیەزانم سات چەنە؟
وەلێ دێرە…یەکێ وە دەیشتەو نییە…یەێ گلە تاکسی نییە وە ماشینەو بچم…برشیام…تیەنگمە…هە ئەو پیم نەۊ چایێ بخوەم…دێر کەفتمەو ڕێ…ئێ پیاێە هەم سات دوانزەێ نیمەروو، بڕێگ میوان نەوەوەختر خسەو شوون و هاورد…خسەمەو دێر…چەوم خاس نیەۊنێ…وەر چەوم ڕمڵ خەێ…نیەزانم هن ئێ تەپ تووزەسە یا چەوم خراوە؟ هن هفار گەرماس…نیەزانم چەن شەمەس؟
شیویامە..لە هساو خوەم ک پەنشەمەس…تفەێ شارە چمان تۊەم مەرگ پشانیدە وە ملێیا…یەکێ وە دەیشتەو نییە هە بزانم چەن شەمەس…؟سات چەنە…؟ ئا ئەوە یەکێگە ورەو ئیلا تێ…سەرمل پێچاس…پرسیارێ بکەم…ئای باوگە کەفتم…هناسم ئەو بان نیەتێ…سام گەرما خسەم…
_”سڵام براگەم…!”
_”سڵام…!”
_”سات چەنە…؟”
_”سات سێ و بیس دەقە…”
_”ئمڕوو چەن شەمەس…؟”
_ “چوارشەمە…”
وەێ ئمڕوو چوارشەمەس؟ لە خێاڵما پەنشەمەس…چۊ نووڕسە پیم…چمان ئاێەم نەیە، تواسم بۊشم براگەم ئاێەم ئاوی دیدە؟ خوو نیەزانم چەن شەمەس…شێویامە…ورگاشتە بۊمە…چوە بکەم؟
هەوو…ئەوەسە کەس وە دەیشتەو نییە…چوار شەمەس…ئەنۊ ئڕا لە منا پەنشەمەس؟ ئێ پیاێ گیژ وڕیشە دەنگ نەکرد…هە لە خڕپڕ میوانەیل بۊ…یانێ خاستر…ئمڕوو کەس لە ئەورە نییە…قڵاێ دڵم گیریاس…یە چەن رووژە سەر ئەو کوڕە نەێامە…پڕ دڵم خوسەس…ئێوارە شرینی سێنم ئڕا سوو…هەوڵ کردم…بۊمە نەتڵ ئاو…ئە…تاکسیێگ هات..!تاکسی..!تاکسی..! دەربەس قەورسان..!!