چهارشنبه ۰۸ آذر ۱۴۰۲
/ /
/
م ڕێوارم له ئێ تکراره ئاسم
ئاهاێ ڕاننده جێ خالی تواسم
بڕان ڕاننده تا ساڵه‌یل ئه‌وسا
خه‌ێاڵ سه‌وز چه‌وکاڵه‌یل ئه‌وسا
«چله» سه‌رده هه‌ر ئه‌و جووره گ زانی
پیاده‌م که سه‌ر جاده‌ێ جوانی
له نوو کۊچه‌یله‌گه‌ێ جاران بگه‌ردم
ده‌ر ماڵه‌یله‌گه‌ێ یاران بگه‌ردم
بگه‌ردم ده‌ر وه ده‌ر، ئاوایه‌گانی
بنووڕم کۊچه‌گان خوار و بانێ
دواره پاپه‌تی شێت چه‌وێ بووم
دواره شێته‌گه‌ێ چه‌و که‌وکه‌وێ بووم
چه‌وێ هێزم بێه‌ێ تا سه‌رکه‌شه‌یلێ
بوه‌ێده‌م تا خه‌ێاڵ که‌شکه‌شه‌یلێ…
***
گوڵ سوو بۊ! وه‌تم دی له‌ێره بووسێ
پیاده‌م کرد و چێ یه‌ێ مین بووسێ
وه‌هارۊ هاتم ئه‌ما ئێره پایز
یه کی وه‌ت: «له‌ێ وڵاته تێره پایز؟!»
ت چۊد و دی چله ته‌نیا مه‌نۊدن
هه چۊ داوڵ سه‌رپاوا مه‌نۊدن
نه گوڵ دی عه‌تر شه‌ۊ واڵ ت لێ هات!
نه واران تام چه‌و کاڵ ت لێ هات!
وه بێ ت دی نیه‌تێ له‌ێره وه‌هارێ
له ده‌یشته‌یلی، خوه‌ره‌تاوێ، نساری
خوه‌راواسه و چله و ته‌نیای خه‌ێاڵێ
وه هه‌ر خاکێ گ پا نه‌ێ خوه‌ش وه حاڵێ
م ڕێوارم له ئێ تکراره ئاسم
ئاهاێ ڕاننده جێ خالی تواسم
چله سه‌رده و دڵم هه‌م ها وه دامه‌و
بوه‌ره‌م گوم بووم و دی وه‌ێ خاکه نامه‌و
کرماشان / 1379
