مەلۊچگ / کوڵه‌چیرووکێگ له فه‌رهاد عزه‌تی زاده
کەس نەزانست ئێ بڕیارە لە کەیا دانریاۊد…
هەرساڵ لە وادەی پاییز، خەڵک، کەفتنە فتراخ ئەوە کە هەرچێ لە دریژای ساڵ کوو کردۊن، بوەنە بارگای مەلۊچگ. ئەگەر خودای نەخواستە، گڕی دێر بۊاتاد، مەلۊچگ هاتە بان ئاوای و جیکان و وەت: ئلان ڕیەمە مل ئاوایەگەدانا تا لە ژێری بخنکیەین.
خەڵک هاوار کردن و هانا و وەتن:
جناب مەلۊچ، ئڕا خاتر خودا هەر ئی یەی جارە مەڕیە!!
هەرکەس وە هەڵەداوان، هەرچێ داشت، گردێ کردنەو و بردنەی ئڕا مەلۊچگ…
تا یەک لە ساڵێ کەم واران، پڕ لە تووز و وشکەساڵی، دجارە مەلۊچگ، هاتە بان ئاوای و تەوڵ شەڕ کوتا و هەر گڕی وەت : ئلان ڕیەم ئلان ڕیەم!
خەڵک نە چێشتی داشتن بەیەن و نەی چێشتێگ ئڕا خواردن.
کەسێگ وەت:
مردن لەی ژیانە خاسترە..
ژنێگ ساڵان ویەردە وەت:
خوەزەو بزانستای ئێ بریارە کی داناس ئڕا خەڵک؟
کاشی وە جییک ڕەسی، خەڵک وەتن:
بیلنا مەلۊچگ بڕیەی و نوقمەسار بۊمن…
هەرکەسێ باووش کوتا لە مل عەزیز خوەی تا وە یەکەو بمرن و چەوەیل بەسان و هناس کوڕ کردن…
مەلۊچگ جیکان و جیکان و خڕ خوارد و فشار دا وە خوەی و چنە پڕۊشەیگ لی جیاوە بۊ، هەرکەسێگ لە هەوڵ گیان، هاوار دەم مەرگ کرد و ناڵانن و نرکانن.
بەڵام، نەرمەواێگ هات و ڕیتگ مەل ولا برد…
فرهاد عزەتی زادە