لاوەکردن ئوستاد پەرتەو لە زوان کوردی کرماشانی / نێعمەت زەحمەتکش
وەپای شاکاریل وەردەسمان دۊنیم چەن دەهە وەرلە ئاخێز شێعرکوردی زندەیاد ئوستادپەرتەو لە کرماشان و دەوروەری شێعر عرفانی وە هەقانی کوردی وە لۊتکە ڕەسیە وە گەورە شاعێرەیلی لەی بواروە هەڵکەفتنە و شاهکارەیل ئەدەبی بی وینەێ خوڵقاننە
لەی بواروە توانیم ئاماژە بکەیمە درویش فارغ کرماشانی وئاسەی ساڵەح و ئاسەی یاقوو مایەشتی …. وە لە ڕی شێعرەکانیانوە ئەهل قەڵەم هان هۊن دانە ئەڕا ژیانەوە وە شانازی زانستن زوان داڵکی یان. ئەرا نمونە درویش فارغ کرماشانی لە جەم چل تەنی ئاسەی براکەی گوران فەرمایش کەی:
هەیتاس هەیتاسەن زروارانن
لەفز شیرین نوتق گورانن
یا ئاسەی ساڵەح فەرمایش کەی
وەهەرزوانی وێت مەزانی
بزان ئەو زوان کول کەس مەزانێ
وەباوەڕ بەندە لەساتەوەختیکدا پەرتەو لەکوناوەنجەی شێعروە دەس داسە ژیانەوەی زوان کوردی لە گەورە شارکرماشان. فرەکەس پشت کردۊنە زوان داڵکی خوەیانو وەلادمەوە نواڕستنە ویەردەی ئەدەبی فرە دەوڵەمەن ئی شیرین شاروە، نازانم ئی دەس کەم گردن زوان کوردیە، ئایا بایسێ بێ ئاگا بین ئەو کەسەیلە بیە لە ویەردەی ئەدەبیات کوردی کرماشانی؟ یادەسێک ئەڕا سڕینەوەی شوناس زوانی لە پشت ئی کاروە بیەس؟
وە تەفرەنج لەسەر ئەوەێکە ئیمە دۊنیم لە یەکی دو سەدەێ ویەردە شاعێرەیل کوردی سراێ کرماشانی هانە ڕز ئەوەڵ ئەدیبەیل گەورەێ کورد. وە تاێوەت ئەدەبیات کوردی گورانی،وەسەر ئی هەمکە پیشینەی ڕەنگینوە لالۊتی فرەێک لە بوار شێعرکوردی سراینوە لە ناو شاعێرەیل هاوماڵ پەرتەو دۊنیم ئەما خوەشبەختانە ئی لالۊتیە لە شێعر ڕەحمەتی پەرتەو نریاسە لا دۊنیم پەرتەو وەچەواشەی شاعێرەیل هاو ماڵیوە لاێیک فرە دڵسوزانە له زوان کوردی کەیوە، وە شانازیوە بەشێک لە هەوڵ بی وچان خوەی خەیدە خزمەت زوان کوردی. جیا لەوە ڕچەی گورانی سرایی لە کرماشان شکنی. توانی وەزوان روژانەو سەردەمیانەی شارەکەی خوەێ
چەندین پارچە شێعر وەزوان پاک وپاراو کرماشانی وە خالی لە واژەیەیل عەرەبی وفارسی بسراێی، وە وەی شێوە گلەیی خوەنەر کوردی لەمل خوەی بخەیی، وە لەی ڕێوە خوەشەویسی خوەی خەیدە دڵ هاوزوانە کانێوەو ناوی لە ئەدەبیات دەوڵەمن کوردی ئەرا هەمیشە ماندگار کەی،
وەباوڕ من بەشداری چینەیل جوراجور کورد وەفیشتر بەشداری ساحیو نەزەریل ولایەنگرەیل ئەدەبیات کوردی لەپرسەی پەرتەو ڕەوانشاد مان زیاتر لەوەر ئەو لاوو گوشە چەوەسە کە وە وەزوان داڵکی خوەی داشتیەس بێ گومان هیچ کار خەێریک لە لاێ ساحێو نەزەر بێ پاداش نامینی. ڕوحی شادو یادی زنە