شاعرێ ک نان وە نرخ روژ نەخوارد / مه‌سعوود قه‌نبه‌ری
لە ساڵیاد شاعر وەناوبانگ کرماشان، ماموستا «پەرتەو» توام ئاماژە وە یەکێ لە تایبەتمەندیەیل ژیان و هۆنەر ئێ گەورا پیاگە بکەم وە ئەوەیش، حۆرمەت و شرافەت و بڕیار و قەرارێگ بۊ ک لە باوەت قەڵەم و هۆنەر و شێعر داشت.
لە کوومەڵگایل جەهان سێیم، وە تایبەت لە روژهڵات ناوێن، خاونەیل قۆدرەت و ڕامێارەیل و دەسڵاتدارەیل حکوومەتی، ئڕا ڕەوایی دان وە بارودوخ خوەێان، تەقلا کەن هۆنەرمەندەیل بکەن وە لایەنگر و داژدار خوەێان و وە داخەو فرە لە هۆنەرمەدەیل، هێز و هاز و بڕشت و ئستعدادێان لە ئێ ڕێیە، وە تاڵان دانە.
هۆنەرمەندێ ک بوود وە لاگر و پاڕێزدار و پێشتیوان حکوومەت، لە ماوەێ کەم گاهەس وە لۆتف بەهرەمەنی و خاون بەشی لە تریبوونەیل فەرمی و حکوومەتی و پاڵپشتی خاونەیل قۆدرەت، وە نان و نەواێگ بڕەسێد و ژیان ئاسوودەیگ بێاشتوود، بەڵام لە دریژای زەمان، لە دیروک فەرهەنگ و کولتوور و ئەدەبیات گومەسار بوود و لە زەێن و ئاوەز کوومەڵگا، خەت خوەێد و پەنکوور بوود.
هۆنەرمەند و شاعر و نۊسەر ڕاسگانی، هیچ هاوچەشنی و هاوبەشی و هەرەچێ وەل دەسگاێ حاکمەێا نەێرێد. هۆنەرمەند ڕەسەن و خاون پێناسە باێس ڕزگار بوود و ئافراندن هۆنەری و قەڵەمەمێ لە بنەما و بنەڕەت فکری و هەست خوەێ، سەرچاوە بگرێد نە وە سفارش دەسەیل لابان، وە ماموستا «پەرتەو» وە ڕاس لە ئێ جەرخە هۆنەرمەندەیلە بۊ.
شاعرێ ک بەرخڵاف فرە لە شاعرەیل روژگار ئیمە، هیچ وەخت پاێ سابت جەرخەیل وجەشنوارەیل مۆناسبەتی نەیۊ و نان وە نرخ روژ نەخوارد.
لە وڵاتی ک دەمتەڕی و قەمتەری و چاپلووسی و سڵەگری، دیروک دۊر و دریژێ دێرێ، «پەرتەو» بەختەوەرانە، ئنسانێگ ئازاد و سەرپەتی و بەرزەمژ بۊ. شاعری ک تمام عمرێ لە ناو مەردم و وەل مەردما و هاو دەرد و هاوڕەنج مەردمێ بۊ.
ماموستا «پەرتەو» لە دریژای تەمەن و شێعرێ، قەت، پاتەخوەری هیچ هێز و لاێن سیاسیێگ نەکرد و ئڕا خوەش هاتن کەسێگ شێعر نەوەت و قەڵەمێ نەفرووشا و شێعر و ژیانێ جیاوازی لە یەک نەێرێ. شێعرێ بەرزە و ڕەسەن و ڕەنگێن و پڕ باێخ و ژیانێ شەریف و نەجیب و سەربەرز و ئازاد. سەربەرز. وە بەرزایی پەڕاو و بیستۊن. یادێ تا هەرمان سەونز و مانا.