دیم سەرد / چیرووکێگ له شێردڵ ئێڵ‌پووڕ
ها ناو دیمێ. سەردێە. بخوارییه‌گە کۆشیاسەو. خوەزێا بتوانسیا دەمێ بێاتا! نیەتوانێ. دەسەیلێ هەم‌گیر نیین. ساێدانە یەکا و ها کەێد و نەێدانە بن هەنگلێ. ورسێ زور داسە لێ. سەرپاێە، قەرارێ نیەگرێ.
تەم و سەرما لۊت نانەسە درانەوە. زقوم پسا سقانەیل دیمەگە شکنێ. قرچ،پوق، … دەنگ تێد. دەنگ وا، لۊلەی گورگ، ورسگێانە.دێرن نزیکەو بوون.
وا پسا خوەێ ساێدە قەێ دیوارەگانا و کیفنێد و له شوونێ لۊلەێ گورگ گشتێ جەوەڵەگە داگرێ.
تەنیاس، تەنیاێ تەنیا لە ناو دیمێ، چووڵ و تەنیا لە ناو جەوەڵێ. دیمەگە سەردە و ناو لە دەیشت سەردتر. تواێ ویرەو بکەێد، ویرێ گردوپڕەو نیەود.
سەرما خڵێفە خواردێەسە دەورێا و تەڵواسە داگرتێەسەێ. لەنوو چەقەێان تێد. نزیکترەو بۊنە. ئەقەورە نزیک ک پووس لەشێ ورسێ بۊنێان هسن کەێ. دەس له درانەگە هەڵخسنە. دەرەگە ناکەسە، وەرەقەێان نیەگرێ، هەمرەسە ک بانەو ناو.”گورگ ورسێ و پەچیەێ کۊەنە”.
پایلێ سسەو بۊنە. خوەشێ تێ دانیشێد و بکەێدەو یاد لە ئەوسایل خوەشێ ک زەمانێانیش فرە کەم بۊ و کۆڵ. له ئەوسایلێ ک جارێتر نیەتوانێ دەسەژی و هسنێان بکەێ. نیەتوانێ دانیشێد و سەرپاێە. هاوارێ دەر قوڕگێ گرتێە. تواێ بقیڕنێد و دەنگێ بەرزەو نیەود. هاز نەێرێ.
دەنگ هەسە هەس گورگەگان؛ دڵێ له بانا داخوروومێد. پووز نانەسە درانەگەوە. چنگیڕ له ئاخر وەرەقەیل دەرەگە خەن. کڕەێ چنگیڕێان له ناو سەرێ هەره کەێد. سەر خوەێ گرێدە مشت و هاوار کەێد.
له دەنگ هاوار خوەێ گازڕانەگە له سەرێ پەڕێد و ها ناو ماشینێ. ماشینەگە وسیاس گواێ رووشنە. دەورێ تەمه، نیەزانێ ها کوورە. تا ئەورە ک چەو کار کەێ، وەفرە ک وڵات پووشانێە. چەویلێ هەنا نیەکەن.
تەمە و دەنگ لۊلەێ گورگ. هێمان خاس نیەزانێ ها کووره،مردێه یا زنێ؟ یا له ئێرە چه کەێد؟ یا ئیە ماشینگەێ خوەێانە یا…؟
چۊ هاتێەسە ئێرە، ئێ بێاوان ئەرق بەرقە وە تەنیا لە ناو ماشینێ؟ نەکەێ هەم گازڕان بوود! دەێ لە لاێ دەم خوەێ، سەردی دەسێ له دەمچەوێ مینێدە جی و شیشەێ ماشینەگە کیشێدە خوار، گولموڵەێ سەرما دەێ له ناو سەر و چەوێ و وە تاف شیشەگە دەێدەو بان و دەرەگە چەکنێ. خوارێ وەزەنه. لۊلەێ گورگ تێ له دۊر، چمان ئێسه دی تێرن. دەرەگە بەسێد.
له لا شفووڕەگەوە تێدە خوار، تا دەرەگە چەکنێ؛ کڵافێ تەم و مژ و سەرما دەێ له ناو دەمچەوێ. پا نەێدە زەۊ. ژێر پاێ رچگیاسەو خرچەێ تێد. جادە دیار نییە. تا ئەورە ک چەو کار کەێد یەخ و وەفرە و تەم داگرتێەسەێ.
ئیسفاێ زەۊەگە گرێ؛ گوڵووم گوڵووم خۊن رشیاس و رچ بەساس، له پاێ ماشینەگە تا ناو دووڵەگەێ شاندەسێ، گوڵە گوڵە و تک تک. زەنجیر چەرخەگان له پاێ تاێر ماشینەگە کەفتنە، شوون پاێ گەلێ گورگ، لۊلنن له دۊر. چمان دێرن لێ خوەن.
داخم یەی تەنیاس؟ ئەرێ؟! نە نەکەێ هەم گازڕان بوود یا وازوەرە.
سەردێ بوود، دانیشێدە ناو ماشینەگە. نە؛ تەنیا نەبۊە، کەسێ گەردێ بۊە؛ بێ‌گومان بۊە؛ کەسێ بۊە گواێ ئیسە تەنیاس. کی هاوردێەسەێ ئێرە؟
یەی له لا شاگرد ماشینەگه بۊ؛ ماشینەگە گواێ کی هاوردێەسەێ ئێرە؟
یەی ک شفووڕی نیەزانێ، بەرجد کەسێ وەلێا بۊه. تەنیا نەبۊە…. گورگێ له نواێ ماشینەگە لۊلنێ.
دەنگ موبایلێ له جیەگە هەڵزڕنێدەێ. ئاو و ئەرەقێ یەکەو گرێد. چەوەیلێ زڕواقه داسەو گورگێ ها له وەراێوەرێ.
له خووف واشیات سفت چەویلێ نۊقنێد و دەسەیلێ فڕە دەێ ک….دو دەس وە نەرامێگەو له بان تەختەگە هڵاژننەێ. داژگارەگەێە ک ئیە سێ ساڵ ئازگاره لەێ تەنیایی خووفناکە وە دادێ ڕەسێد و سەویریێ دەێ.
“خوەزێا منیش بخواردان. ئێ دیمە پسا پۊنگ پۊنگ له بناخا جاێدەمەو” . گیرێد. داژگاره‌گه چێیه. دیمه‌گه هه‌م سه‌رده و…