ئاوشووران.عه‌لی ئەشرەف دەرڤیشیان / هەڵگیردان کوردی پدرام ئەسەدی
“ماڵ ئیمە”
ئاشوورا جا تووپیاین سەگەل پیر بی. جا عشقبازی بەتئاویەل. جا فڕە داین پشیەلێ ک خاو ڤە مەردم حراما کردۊن. ئاشوورا جا بازی ئیمە بی.
سەرڤەهارەل یا ئاخرەل پایز ک ئەؤر سێ ئاسمانە مەکپان، باوەم ڤە نامجا ئووتاخە مەناڵان ک:
“خودا غەزەبتە ئیمە دۊرا کە. “
ئەمان خودا گووشە قسە باوەم نمەتەکان. لافاوە مەهات. گونجەڕە مڤیا. مەشوورد و مەچیا. کەفە ماوردە سەر. پێڵەل چووین مؤردە گەرد. درەقەد ماڵەل بان شەهر ک ئەژ کوچک و ئاجور سازریاوین، نمات. ئەمان ڤە ئیمە ک مەڕەسیا، کول داخەدڵی وژ هالیا مەکرد.
دێوارەل و لانە مەلۊچکەل ڤەگەرد یەکا مؤیرد. لافاو تا نام ئووتاخمانە مات. مەمینستە مێمان نەڤەوەخت. ڤە کوڵە سۊکەل و سەنووق ماڵەلیش سەرە مەکیشا و کتاوەل دوعا باوەم مەفیسان. باوەم مؤت:
“ئاشوورا هەقاتی پاسەوانەل سەر مەکەێە نام هەر کوناێ.“
نەغمەل نام ئاشوورا هالیە مڤیان، گەن گوتاڵەل مەرشاننە نام ئاشوورا. ڤەبان شەهر هەر هانە ماتە وار، بارەی ماوردە گەرد تا مەڕەسیا دراسان ئیمە. کول بارە هالیە مەکردە بان گوردە ئیمە.
لافاو کول چێ گەر وژا ماوردە گەرد. پاڵان خەرەلێ ک وژیانیش دوماجار مەهەتن.
تیر چووەل کەڵنگ، ڕیشی دار. کێی و گەنم ئابادیەل دۊروبەریش هەم ماورد.چانەل چووین،گا و پەس و پشی هەم ماورد.هاوارە ماوردەگەرد. قوتیەلێ ماورد ک ئەسک ماسی ڤە ملیان بی. ئەسک ژەنەل ڕەنگین ڤە ملیان بی. یەک گلیش لەلوو کوینەێ ڤەگەرد ئایلێ ک هالیپا داشت مەزیڕان هاوردێ.
لافاو پێڵەل چووینە مەڕمان. پێڵەل کوچکین تەکان نمەواردن. تا پێڵەل دورسا بوون، ئیمە هەمیشە دێرە مەڕەسیامنە مەدرەسە و چووە مەواردیمن.
لافاو ک مەنیشتا، ئاشوورا جوور ئەوەل خوەش خوڵکە مڤیا، دەس دڵوازە مڤیا، دووارە شەفیع کوور ڤەگەرد نەی ئاهنینەی مەنیشتە لا دێوارەل نمدار ژێر هوەرەتاو، ئاشوورا پڕ ئەژ گورانیەل کوردیا مەکرد.
شەفیع کوور ڕووژگار مەنساف ڤەگەرد ئاشوورا بی. چەمەلێ قڵا پۊک بی.
دا مؤت: ” هەنی ئایل بیە، فرە شەیتانی مەکردێە، چیەسە بان دار تا قڵا بازڵەل بارێیە وارا، قڵال رشیانەسە سەر و چەمەل هاوردنەسە درێرا.”
ئەمان شەفیع ڤە ئاوڵە کوورا بۊ.
دوما لافاو مەچیامنە نام ماسەل سێ رەنگ، مەگیردیایمن. پۊل پێیا مەکردیم. کەمچک و بتری شکیا پێیا مەکردیم. یەک کڕە لافاو دوکان چەمیلکە سازێ ڤە نامڕاس شەهر بردۊا و ئیمە چەن گلە چەم عاریە پێیامان کرد.
یەک ڕووژ بتریێ ک ئەسک ژەن جوانیدارێ ڤە قەیا بی پێیا کردیمن. باوەم هەر ڤەخت تاماشا مەکردێ، ژێرچەم تاماشا دا مەکرد و ژێرلچ ک دا نەشنەوێ، مؤت:
“ههههەی! ڤەنام دونیا چ چێیەل خاسێ هەس.“
دوماجار بتریە بووە مەکرد و مؤت:
“ئاخ ئاخ! لەئنەت ڤە کردارت! ” بتریە فڕە مێا ئەمان دوما ڕووژەل دووارە ئی کارە ڤەسەرە مەگرد.
شۊشەل نام ماسە دەس و پامان مؤڕیان. یاواش مەهاتیمن و خەڵەکوو تۊنەل هەمام ک ڤە بڵنگ ئاشوورا هالیە مەکردن، مەپشکانیمە بان زامێلەمان. ئەژ کەینیەلێ ک ڤە بڵنگ ئاشوورا مەتووقیان، ئاوە مەواردیمن. مەچیامنە لا خەڵەکووەل گەرم، مەخوڵمانیمیان و قرمزی ئاگر و سؤزی خوەش ڕەنگ لاستیک سوزیال تاماشا مەکردیمن.
یاواشێ مەچیامن و ڤە ماڵ نان مەدوزیامن و مەیشتیمنە لیفە شواڵەمان تا دا خافڵگیرمان نەکەێ. هەنێ ئەژ ئووتاخ ماتیمنە دەیشت، دەسمان ڤازا کریا تەکانە میاردیم ک یانێ چێیک نؤردیمە، ئەمان وژمان تەکان نمێاردیمن ک نەکەێ نانە بکەوێ.
ئەگەر دا بۊنیا ڤەگەرد چنگڕ نام ڕانمان کاوا مەکرد. ئاە و ناڵە مەکرد و سەر وژ مەکوتا دێوار. مەنیشتە سۊک ئووتاخ ، زرانیەلێ مەگردە باوش، وژ ڤەرێ چەپ و ڕاسە مەلەقان و مەلاوان و مؤت:
“کزە کەر پا دێوارەل ڤە وژم. چارەڕەشە وژم، ڕیامە قؤر ئەڤە ک من دایتێ شۊ. ڕوڵە ڕوڵە ئەڕاتان بکەم ئلاهی.” مەمکەلێە مەگرد و ڕۊ ڤە ئاسمان هاوارە مەکرد:
“شیرم حڵالتان ناوا تا ڕووژ قیامەت. “
ئەکبەر ک ئیجوور ڤەختەل پتێ تیرە مەکەشیا، ڤە بوقزێکا مؤت:
“کاشکا مڤیا ئایم هەر نان نەرێ تا دا خوەشاڵا بوو “
منە مؤتم:
“! ئاخر نماو، هانە بوو مەمریمن “
ئەکبر ڤت:
” خاستر، ڤە دەس دا خڵاسە مەؤمن. “
دا ک ئیمە پەکەر و بەزە ڤە سۊک دێوارا مەؤنست. مڤیا گیرە و مؤتا:
“ڕووڵە ئاخر ئەڕا ئەزیەتمە مەکەینان. خوو شؤ جواو ئە باوە سەگە چە بەما؟ ”
باوە سەگ، باوەمان بی، ئیمەیش ڤەگەرد دا ڤانگە مێیایمە گیرە.
هەرگل ئایلێک ڤە ئایلەل کۊچەمانە مەمرد، دام تا چەن ڕووژ نفرینمان نمەکرد، حەتا ماچمانە مەکرد و وژە مەکردە خڕ سەرمان. ڕۊ مەکرد ئاسمان و مؤت:
” ڕووڵە، ژان هومە بەرێە تووق سەرم، ئەزیزەلم. “
ئەمان ڤەگەرد یەکەمین لخمە نان ک ڤە نام دێگ هیزە میاردیمن، نؤڕو ناڵەی شرووە مڤیا.
ئەژ زخاڵدان خا مەدوزیایمن، ماوردیمن و مەیشتیمنە ژێر خەڵەکووانێ داخێ تۊن هەمام تا مەکوڵیا. گاجار خا ڤە ژێر خەڵەکوو مەتووقیا و خەڵەکووە مەپشکانە چەم و هەڵقمان. ئەر ڤەگیرمان باتا، بێ و چونەر مەیشتیمنە ژێر خەڵەکووەل و کوڵیا و نەکوڵیا ڤە دەس یەکا مەڕویقانیمن.
ئاشوورا ڤەگەرد بوو مستراوەلێ ئیمە ڤە باوش وژێ جا مەکرد، ڤەبان لۊلەل فلزیێ ک ئاو ڤەرێ ماڵەل ئاجوڕی مێڤرد ڤەرێ ئیلا و ئەلا مەدڤیایمن و مەرج بەنیە مەکردیمن.
“رێخمە مشتت” مەکردیمن. ئەڕان سەگەل چەتاڵ و پشیەل بێ پەنا ڤەگەرد کوچک لانە مەسازیایمن. مەنیشتیمنە دؤر شەفیع کوور و گورانیەلێ گووشە مەکردیمن.
شؤ ڤەگەرد سەرمل تەپ و تووزین و دەسەل قاچ قاچ و خۊنی، ئوولە مڤیامنە نام ماڵێک کز و کوور. ڤە نەڤەدڵی سڵام دا مەکردیمن ک مووتگە داۊتێ سەر چراخ گرسووز. ڕپە نام دڵمانە مات ک دا سەر داسە دێگ یا نە. هەنێ چەمێ مەکەتە دەسەل ئیمە ڤەگەرد قیافە مێهرەبان، ئەمان بوقز کردێ، مؤت:
“بەدبەخت بیمن. هەرچێ پۊل دریمن باس بەیمنە ڤازلین ئەڕا دەسەلتان. بینانەسە فەڵەل قەزڤین، ڤە شؤیەکی تا ئێوارە کارە مەکەینان و ئێوارەیش هۊچ نەێرینان.”
لافاو ڤە قەی دێوارەل ئووتاخەمان کڕە مایشت. باوەم مەزانست پارەکە یا چەن ساڵ پێش چەنێ لافاو هەتێیە. توڕێ ڤە بان دێوار مەنۊیا. باوەم ئاماژە ڤە دێوارە مەکرد و مؤت: ” یەیشە تەقویم دێواری ئیمە.”
لافاوە مەهەت. ئاشوورا پڕە مڤیا و ئاو مستراوەل فیشقە میاردە بان. هەسار پڕە مەکرد. چا ئاوە پڕە مەکرد.
چووەل پۊترکیای و کێی و کوڵەش و چەپە گوڵەل چلۊسکیای بان شەهر نیشنەل، مەگردیە بان دەس و ماوردە نام ئووتاخ ئیمە پێشکەش ئیمەیانە مەکرد. تەنیا زوان نیاشتێ تا سڵام بکەیتێ.
گڵێمە جەما مەکردیمن. شاواڵمان میاردیمنە بان. خشتەکمان تەڕە مڤیا و شڵپە شڵپە مەکرد.
دام ک چارچێڤەی گرێ داویە نامقەی، ڤەگەرد قولەل سفێدێ ڤەنام ئاوە مەڕکیا و تون تون سڵەوات مەنارد و مؤت:
“ئیسکە دونیا ئاوە مؤرێ، توفان نووحە. بەدبەخت و ماڵ ڕمیاوا بیمن، ئەی خودا سەگ گوناکارێکم ڤە دەرگاهت. بەزەیتە ئی ئایلەلە بای.
هووپ هووپ هووپ! ئەی خودا سەگ ڕۊسێ دەرگاتم.”
ئەکبەر ک شەیتان بی سەرە مەکردە ئاسمان و مؤت:
“میو میو میو!ئەی خودا بچکە پشیێکم ڤە دەرگاهت.
دام بەدێە مەهەت و مؤت: “تا هومە ئایلەل سەر ئەژ توخم هاوردینانە ئێر دونیا خراو کردینان.دؤرە ئاخر زەمانە.مەێ خودا گەن تر ئەژ یە ڤە سەرمان نارێ؟ ڤە خودا ئەر ئاگریش ئەژ ئاسمان بووارێ هەم کەمە. ”
منە مەزانستم ک ئاو دونیا نمؤرێ. ئاو تەنیا ماڵ خەرێگینە مؤرێ. وژم چەن ڕووژ ڤە نام ئاشوورا تا ئە بان شەهرە چۊم.
ماڵەل کوچکی و ئاجوڕی ئاو نمؤرتێان
لافاو ک مەنیشت، قاقز سێیێلە ک ڤەنام کۊچە جەما کردۊمن، ڤە نامڕاس ئووتاخێ تەڕ کووە مەکردیم و ئاگرە میاردیم. دەر کپا مەکردیم تا ئووتاخ هوشک و گەرما بوو، دوماجا مەچیامنە لا هامسا بانینە ک ئاو نمەگردێان. نان و هەرچێمان داشت مەرشانیمە بان یەک و ڤەگەرد یەکا مەواردیمن.
باوەم مەنیشتە لا باوە ئەوان ک حەماڵ بی، هەردک ڤە بێکاری و ڕووژگار قسە مەکردن.
باوەم باوشە مەکرد مەنقەڵ ئەوان. گوڕان ئخ تف سینەی مایشتە لا مەنقل و ڤە خەڵەکوو سەرێ مەپووشان. دا ڤە یاواشکا مەخوتان:
“بووە کوفتت خودا کردمە، مەنقل مەردم پڕ کردینە ئخ و تف. سینە خەفە درێ بەدبەخت.”
ڤەگەرد ژەن هامسا کڵاشە مەچنیان و دەرد دڵە مەکردن.
من و ئەکبەر ڤەگەرد دت هامسا ک ڤە ژێر چارچێڤەی بوو خوەشێکە مەهەت و پشت ناخۊنەلێ ڤە بوونە کڵاش چنین ڕیشڕیشا بۊ، قەمچانمانە مەکرد.
ئەڕا خفت مەچیامنە وار و قاقز سوزیالە ماوردیمە دەیشت و ڤەبان زەمین گەرم مێەسیایمن. گل گلێ ئووتاخە خراوە مڤیا. سەقفەی ماتە وار. هانە ڤەختەلێ، تا چەن ڕووژ ڤەنام کۊچەل ئیکان و ئەکان ئاشوورا ڤەشوون ئووتاخە مەگیردیایمن. دا و باوەم ک هەرکامان بڵنگێ ئەژ ئەسباوێلەمان ڤە دسان بی، سەرە مەکیشانە نام ماڵەل، دام چارچێڤەی مەکیشا بان دەمڕۊیێ. کەلەی ڤە بان دەروازە هەسار ماڵ مەکردە نام و ڤەگەرد ئاخ و ئوف مەچریا:
“ئاباجی تون خودا ئووتاخ هالی درینان؟ خودا خەیر ڤەڕێ تان بارێ.”
باوەم ڤەی ڤەختە قیافە ئومێدەوارێ مەگردە وژ. هناس ڤە سینە گیرا مێا. چەمەڕێ جواوە مڤیا. قەڵب ئیمە ڕپەڕپە مەکرد. ڤەگەرد چەمەل شەکەت تاماشا دەر و دێوار ماڵە مەکردیمن. ئەمان ماڵەپەڕ دەنگێ ڤە نامڕاس هەسار جوواوە مێارد:
“نە خؤەکەم، ئووتاخ هالی ها کوو، هومە سەدمین کەسینان. خوو ئیمەیش بسەڵمانیمن، کار و زندەگی دریمن.”
دەم لچ دا شووڕە مڤیا. پتێ ڤە چارچێڤەی پاکا مەکرد. باوە سەر مایشتە وار. تفێ مایشتە زەمین و مؤت:
“تفە گووڕ مەسەبت.” و هڵاماتە ماوردە سەر من و ئەکبەر مؤت:
“بایەقوشەل، قووشمەل“
مەیوایمن، ئەمان دووارە دۊر ڤە ئەوانە ڤە شوونێان مەکەتیمە ڕێ. لافاو تەماما مڤیا. ئاشوورا ژیان ئەژ سەرە مەگرد. دووارە سەگەل پیر ڤە کەل و کونال مەتووپیان. ئایلەل و پیرەمەرد و کەیوانووەل ڤەگەرد گونیەلێ ک هایشتۊنە ملێان، ڤە شوون ڕووژی، ماسەل سێ ژێربانە مەکردن. گونیەلێ پڕ ئەژ بەچکە پشی هالیە مڤیانە سەر ئشقاڵەل تا دووارە ئیمە بؤریمێانە ماڵ، بەتئاویەل ڤەگەرد قاڕەقاڕیان تون تون عشقبازیە مەکردن تا بڵنگ ئاشوورا پڕ ئەژ جۊجکەل زەرد و ڕەنگین بکەن.
هەر ئێواران شەفیع کوور بلوورە مێاردە ژێر هەنگڵ و مەچیا ماڵ و ئاشوورا سووت و کوور و تەنیا مەیشتا.
٢-
“ دو ماسی ڤەنام قەندان “
ئێواران پەنج شەمە بی، هەقاتی کول پەنج شەمەێ خامووش و دڵگیر و گەڵێکیش خوەشی تەتیلی جومە. ئاخرەل پایز بی. ئووتاخ هالیپا نمدار بی. یەک هەفتە
پێش لافاو هەتۊ. باوە کەڵنگمە ژێر کورسی ڤەتۊا هوەر ڤە بان دێوار کاگڵین هەسار کەم گیانە مڤیا، دڵمە مەگست هوەر نەچوو، هۊچ ڤەخت نەچوو و مەخشێلەم وژیان سەروژ بنۊسریان و باوەم ڤە خاو هیزا نەگرێ. هەرگل هیزە مەگرد، پەڵپە مەگرد و کوتەڵ کوومانە مەکرد.
چرچە لەرزەێ شەمە ڤە دڵما بی. ئە هەمکە مەشخ و جەدوەل زەرب و مەلم نامێهرەبان و دەنگ ماس فرووش دؤرەگەردە ڤەنام کۊچە.
ئەڕا هۊچ کەس نێڤی ک دوسمان بگرێ؟ ئەمان بی. بەچکە پشیەلێ بین ک شؤڤان، ڤە دوزیا مؤردیمنە نام جلجامان.دەسەلمان مەلێسیان و ئەڕامان خڕخڕە مەکردن، ئەمان تا ڤیرە مؤڕیایمن، مەچیان و پا باوەم مەلسیان و قەپە مەگەردن و باوەمیش فڕەیانە میاردە نامڕاس هەسار.
شێعرێ “ئایلێ یەتیم” ڤیتەڤیت مەکردیمن ک کۊزەکەێ شکیاوی. کەتمە ڤیر مەلۊچکە ک چەن ڕووژ پێش مردۊا. ئەژ مەدرەسە ک هەتم مرد. هایتر دەس گیرداوی تا ئەژ مەدرەسە باما، دوماجار بمرێ.
من ک هەتم کز بی. موچە کیشام نەهەت. چیمە نزیک، سەر هیشتە زەمین و مرد.
هوەر فڕەفڕە مەکرد. ئەر بچیامە نام ئاشوورا هوەرە مؤنستما ک هالیپا ئەژ دیوار نانەوای نەچۊە بان. هؤسێڵە دەیشت چینم نێڤی. کورسیە من چەسبانۊە وژێ. باوەم خڕەخڕە مەکرد. ڤسێم بی، ئەمان دام، من و ئەکبەر قەسەم داوی ک دەسە نانە نەیمن. دا ڤە لاڵکە لاڵک ڤتۊ:
“ڤە پیر، ڤە پەیخەمەر، پۊلمان نییە دووارە نان بخڕیم.” دوماجار ڤتۊ:
“بووشنا ڤە ئیمام ڕەزا نان نمەریمن”
ئیمەیش ڤساۊمنە لا دێگ نانە و ڤەگەرد یەکا ڤتۊمن:
“ڤە ئیمام ڕەزا، ڤە گیان دا، نان نمەریمن. ”
دا چۊە بازاڕ کولیچە پەزەل تا کڵاشەلێ ک چنۊیا، بەیتێ خاون کارە تا ڤەگەرد حەق دەسەکەێ، ڤەسەر ڕێ، ئەڕا شؤ کەلەپاچە بسینێ. ئەر دوکان خاون کارە دام، بسریاوی فرە خەمینە مڤیا. تا ماڵ مڤیا گیرە.
ڕووژنامەێ ڤە قەی دەر دوکانێکا تەکانە مەوارد. ئەسک سێ گلە ئایل ڤەبان ڕووژنامە بی ک خرسە ڤقینەێ گردۊنە باوش، خرسە فرە گوپن و ڕەنگین بی.
دووارە کەتمە ڤیر شێعرێ ” ئایل یەتیم ” ک ئەسکەێ ڤەنام کتاوەمان بی، دڵم گیریاوی. چێیک ڤەنام هەڵقم بان و وارە مەکرد، ڤەنام هەڵقم هەتە سەر، هەتە نام
دەمڕۊم و ڤە چەمەلم دا دەیشت و نامڕۊم گەرما کرد. ڤە پشت دەست، دەمڕۊم پاکا کردم، شووری ئەسر ڤەنام ترەکەل پشت دەسم ڕێ گردە ڤەر و کزەکز کرد.
سۊک دەرە ڤازا بی. ئەکبەر کەلە کردە نام ئووتاخ و ڤە توک پا سوڕیە نام ئووتاخ. سەر هیشتە لاگووشم و فچەفچ کرد:
“دو گلە ماسی گوجین هەتنەسە نام کەینیە دەم ئاشوورا ماین بچیمن بگریمێان؟”
ڤەجا پەڕیم و ڤتم:
“بچیمن، بچیمن. بێدەنگ، باوە نایە خەڤەر. ”
تەکان ک واردم کورسی جیڕە جیڕ سەختێ کرد. خڕەخڕ باوەم تەمام بی. هناس من و ئەکبەر ڤە سینە بریاوا. باوە شان ڤە شان بی و بڕیا بڕیا ناڵە کرد:
” خودا غەزەبتە ئیمە بایژە دۊر”
هەر ڤە ئە نەزمە نیشتیمن و چەم بڕیمنە بان کورسی. سەر کورسیە کڵافێ ئەژ بەن کڵاش ڤەگەرد دەرزیێ کەتۊا. باوەم دووارە کەتە خڕەخڕ.
ڤە توک پا چیم و قەندان گوجینێ ک ڤە سۊک تاخچە بی، هیزداما.ملاتی قەندانە ترەک واردۊ، ڤەنام ئاشوورا پەیداما کردۊ. هەنێ ڕەسیمنە کەینی خەڤەر ئەژ ماسی نێڤی. دڵگیرا بیم. ڤە ئەکبەرم ڤت:
“سە هاکوو، هەم دوروو داین نادورس؟”
ئەکبەر ڤت:
“نادورس وژتین. گاس چینەسە ژێر هەڕێ.”
دەسم بردە ژێر هەڕێ و جووریما. ماسی زک زەردێ شەلاخە دایتێ. ئەکبەر خوەشی خوەشی ڤت:
“ئەێ ئیمام زەمان ئەڤەسەتێ.”
پڕ قەندان کردیمنە ئاو. دووانی ڤە خەفەت ماسیە گردیما. هوەر ڕەسۊە سەر خانگ نانەوای. زوق و کزە سەرما ئێواران دەسەلمان سڕا کردۊ.
یاواش هەتیمنە نام ئووتاخ. دام نەهەتۊ. ئووتاخ گەڵێ تەریکا بۊ. باوەم هالیپا خڕەخڕە مەکرد. ئایلێلە ڤەی ڕووژنامەلە پاکا بۊن. یاواش چیمنە ژێر کورسی.
دەمە وار درێژ کیشایمن و قەندان نیامنە ڤەر دەممان
ماسیەل ڤەگەرد چەمەل ڤەرهاتێ تاماشامانە مەکردن. ئەکبەر دەس برد و قەندان کیشا ڤەر دەم وژێ. من دووارە کیشامێە نوا وژم. ئەکبەر ڤە نۊز نازا
ڤت:
“هن وژمەها”
ڤە قەیزێکا ڤتم:
“قەندانەێ هن منە. تازەیشەم من ئەڕانت گردمێ”
ڤە تونێکا ڤت:
“هن وژمە. هن وژمە. من ئەڤەل کردمێە دی. ”
یاواش ڤتم:
“سە، قەندانە من ماوە چە؟”
ڤت:
“ئێسکە مەچم جامێکە مارم”
گست هیزگرێ ک پای واردە ئاگرە ڕێزە ژێر کورسی. خڕەخڕ باوەم ناتەماما مەن.
ڤە ناراهەتی گوپ ئەکبەر ک نەرم و بێ خۊن بی گرتم و چلانم و ئەژ جەر مەڕکیام.
ئەکبەر چریقە خەفەی کیشاوا: ” ئای، ئای”
ماسیلە بێدەنگ ڤساوین و هەر ئاوە مەواردن.
کورسی تەکان وارد. باوەم ڤساۊە بان سەرمان. چەمەلێ هەقاتی چەم ماسیلە بۊا.
ئەژ ترس چیمنە ژێر کورسی و لافە ڤە ژێر قورس گردیما. دو گلە گورمچە ڤە پشت لافە هەتە بان کەپووڵمان. لاف ڤێڵ دایمن و ڤە قیژ و قاژ دایمنە دەیشت.
قەندانە ڤە دەس باوەم بی. دەر ڤازا کرد و فڕەێ دا نامڕاس هەسار. ماسیلە ڤە بان زەمین پەل پەلە مێاردن. قڵا بازڵەێ ڤە بان خانگ قاڕە قاڕە مەکرد. هەت و نەمیە ماسی بردا.
ئەژ دۊر ئەؤرەل ئاسمان سێیە مڤیان. ڤە نام تەریکی ڤە سەر پلەل بان خانگ قوژگەمان داوی. فچفاچ خوسەبار ئیمە، دڵ تەریکان ڕیشا مەکرد.
تاوان تو بی.
تاوان تو بی.
تاوان تو بی.
تاوان تو بی.
دڵمە ماتە یەک. ئەژ ئاشوورا دەنگ تۊلە سەگ چوو واردێ مەهەت. دام نەهەتۊ.گاس دوکان خاون کارەێ بسریاوی و ئەۊ هالیپا چەمەڕێ، ڤە پشت دوکانە نیشتۊیا.
٣-
“بیالون”
شؤڤان هاڵو موسا، کتاو کؤنەکەێ ماورد.چەمیلکە بایمی و شکیاکەێ مێاردە سەر چەم و ڤەگەرد گرێگاو دەسە مەکەردە خوەنین.
” بی بی ” ک دا کەڵینگەمان بی ڤەگەرد باوەم مڤیانە گیرە.مەمو پیرە ک شۊ “بی بی” بی و هەمۊشە نمازە مەخوەنیا، هەر هانە ڤە سەر نماز مەگیرست و ئەسر ئەژ بان ڕیش چەرمێیە مەتکیا.هەرکەس نمڤیا گیرە باوە ڤە مشت مەکوتا نام کەپووڵێ. ئەمان ڤە هاڵو موسا و بی بی و مەمو پیرە نمێارد. هایتر ڤە خاتر ئەڤە ک ئەوان خاسە مڤیانە گیرە.گاسیش زەڵەیە ئەوانە مەچیا.