بەیانیه‌ێ لێژنەێ داوەرەیل خڵات بەڕۊ (به‌ش چیرووک)

 

هاوڕێان..! لە دنیاێ خالی لە ئەخڵاق و مانا و پڕاوپڕ لە بێ نرخی و ئبتزاڵ ئمڕوژ، ئەدەبیات دەرفەتێگە ک ئیمە بوەێد وە ناو فکر ئەو چێشتەیلە ک لە کیسمان چێنە و لە جەهان ئمڕوژ، جاێان خالیە.

ئەدەبیات وەرز هاوبەش ئەزموونەیل ئاێەمەیلە، لە سەردەمێ ک تکنولوژی و جەنگ و زێادەخوازی، مروڤاێەتی لەت لەتەو کردێە. کوومەڵگاێگ ک هۆنەر و ئەدەبیات لە ناوێ هناس نەکیشێ، تۊش گەوجی و وشکەفکری و ڕەگەزپەرەستی و کەماێەتی عشق و دووس داشتن تێد و هۆنەرە ک دەرەقەت دەێدە بەشەر تا بتۊیەنێد تاڵی و ڕەنج جەهان دەر بوەێد. تا ئنسانەیل فێشتر یەکترەکی بناسن، وەل یەکا قسیە بکەن و وە یەک نزیکەو بوون. هۆنەر قڵف سنوورەگان شکنێد و مرۆڤەیل وەل یەکا پەێوەند دەێ.

لێژنەێ داوەرەیل دوهمین دەورەێ خڵات ئەدەبی بەڕۊ، وەل خوەشەواڵی لە بەڕێوبەری ئێ ڕووداو پڕباێەخە وە  لە شوون خوەنین و هۊردەو بۊن لە ناو بەرهەم و پرتووکەیلێ ک لە چەن ساڵ وێەردە، لە مژارچیروک و ڕۆمان، لە پارێزگایل کرماشان و ئیلام، چاپ و بڵاو بۊنە، وە یەکیەتی ئارا، ڕۆمان ” تاتریک، سانێگ لە بان ئاو” بەرهەم نۊسەر جوان و نوخواز وتێکوشەر، ئاقاێ ” مازیار نەزەربەێگی” وە عنوان هەڵوژیاگ کوتایی، دیارێ کەێد. ڕۆمان تاتریک، ئەزموون جیاوازێگە لە چیروک نۊسان کوردی و هاوئاهەنگی و هاودەنگی لە ناو فۆرم و دەروون ماێە و زووان، شێوەێ ڕیک و پیک ڕەواێەت کردن، زوان ڕەوان ئامێتە وەل خێاڵ، دەسڵاتداری لە وێنەگەری و دەرخستن و نیشان دان ئەمر ئنسانی و کوروورەیل بەشەری و بارودوخ سەخت و پێچیاگ کوومەڵگاێ ئمرووژ، لە تایبەتمەندییەیل ئێ کتاوەسە.

لێژنەێ داوەرەیل، وەل پیروزبایی وە جناب “مازیار نەزەربەیگی” سپاس و پێزانین خوەێ، وە ئەوڕێ خەرەیل خڵات بەڕۊ پێشکەش کەێد.»

مه‌سعوود قه‌نبه‌ری، چه‌نگیز ئقباڵی، عه‌لی حاته‌می

دیدگاهتان را بنویسید

نشانی ایمیل شما منتشر نخواهد شد.