پنجشنبه ۱۳ اردیبهشت ۱۴۰۳
/ /
/
کوومه شێعر وه‌فرینه‌گان شێعره‌یلێ ها له تێ که له ساڵه‌یل 1393 تا 1396 وه‌تیانه و ئه‌وه‌ڵ جار قه‌رار بۊ وه ناو «ڕز ڕز ڕزیان» بڵاوه‌و بوون و وه ده‌س وه‌رده‌نگه‌یل بڕه‌سن. چه‌ن گیچه‌ڵ بایس بۊ ک هه‌م ناوێ بگۊه‌ڕێد و هه‌میش دێرتره‌ک وه‌دێ باێد و بووده کتاو .
1
ئێ سقانە مردێ وە قەێه‌و نیە!
ئێ کتاوه، که‌لیمه،
ئێ خیاڵه، دلیمه،
ئێ داره، پایز،
ئێ سقانە،
مردێ وە قەێه‌و نیە!
***
قه‌سه‌م وه هه‌ر کتاوێ
ک چه‌و که‌و ها له ناوێ،
دنیا خه‌م ِ سیه‌ێگه
ژێر ته‌م ِ سیه‌ێگه
له‌ێ کۊچه‌ێ ئاسِ‌مانه
جمهووری زه‌لانه
هه‌ر چێگ هه‌س ده‌مێگه
گوپێ تیه‌ڵی وه‌مێگه
هه‌رچێگ هه‌س، له‌شێگه
چه‌ش ته‌ش به‌شێگه
هه‌رچێگ هه‌س، سقانه
سقان سه‌رد گیانه!…
وه‌هار1394
2
له‌شێ له خوه‌م!
له هەر جیێ لە زەۊ کەنم
لەشێ لە خوەم لە تێ دراێ
له‌شێ له ساڵه‌گان دۊر
له‌شێ له رووژه‌گان ته‌رت!
له هەر جیێ لە زەۊ کەنم
چه‌وم له ساێ ت گه‌ردنم
له سات ت
له ساڵ ت
له قه‌ڕن به‌رزییه‌یل هۊر ت
له تاش ته‌رز دۊر ت
له شوون قه‌ور گه‌وریێ
گ خه‌سره‌و سه‌راوه‌نۊن…
***
وه داخه‌وه
له هەر جیێ لە زەۊ کەنم
لەشێ لە خوەم لە تێ دراێ
له‌شێ له ساڵه‌گان دۊر…
شاباد / زمسان 1393
