ئڕا مهردم گوڕاێ گوڕ فهقیرهو بوون؟ / جهلیل ئاههنگهرنژاد
سرمقاله صدای آزادی : تهل ساتهگه سا شکانێهسه سهر 4 نیمهرهودۊیا و دهنگ زیڕهێ دزگر بانکێ گ هاوسامانه، فرهتر له نیم ساته شهقامهگه داپووشاێه. چهن جار له لوو دهروهچهوه نووڕمه دهیشت. پێایێگ له تهمهن 45 ساڵان دهس ناسه گیرفان شواڵ جافییهگهێ و ههر سهرهخڕی کهێ. له نیهروهو یه فره جاره دۊنمهێ. د شکهو بۊمه. قیژهێ دزگر و مهردم ههوڵێ گ شهقام گهز کن و ئێ پیاێه، دهس دانهسهو یهک گ وه کوومهو بنووڕمه دهیشت.
خێاڵ من و فره کهس وهێ چۊنه ڕهحهت نییه. چمانی دهیشتهگه ئهمن نییه. چمانێ گشتێ د شکن.چمانێ گشتێ وه کوومهو چن و تییهن. تهل ساتهگه چێیهسهو نوواترهک. کن وهن کهم ک زۊترهک بچم ئڕاێ ماڵ و لهێره دهرچم. چمهو خوار و وه پێاێ نزیکهو بووم. توام بپرسم: ئڕا ئێ قهره لهێره وساێه؟ تا دی دڵم قایم بوو ک خراوهێگ وه دهسێهو نییه. یهک دو گام مهنێیه، ئۊشم برا یه قهێرێگه هایده ئێره! چۊ وسایده؟
پیاێ بێ دهنگێگ نیشان دهێ. ئێرنگه دی خاس دۊنمهێ. مۊسهرێ فرهتر وه بوور بردێیه تا سییه. سێوڵ پیاێانهێگ، کابشن بوورێگ و چهوهێل ئارامێ گ چمانێ تماشا له تێ نییه!. ئاخر کهلیمه گ له دهمم دراێ ڕهسمه لاێ و له وهتن بهتاڵمهو بوو. پیاێ، چهن جفت جوراو ناسه دهر دکانێ گ تا ئێرنگه له م شاریاۊدهو. تهنیا چهن جفت!.
تهکان خوهم!. ههناێ دڵ ئاێهم ئهمن نهو، چ خهێاڵهیلێ گ وه ناو کهپووڵیا خڕ نیهخوهێ؟! جیا له یه گ له کردهێ خوهم بهتاڵمهو بوو، دڵنگهرانی ترهکیش وهشکێده گیانم: دجاره دهسهیل خالی مهردم!. دجاره ههژاری و فهقیری و بێ کهسی مهردم چۊ هۊها تێده ملما. د شک بۊنم تهمام بوو. ئهول پیاێا کهیف خوهشی کهم و دهمهێ ئهو بارهگهێا…
له ناو ڕێ وه یه فکر کهم: ئڕا دهس مهردم ئهوقهره پهتییهو بۊیه؟ ئڕا ڕووژ وه ڕووژ گیرفان مهردم خالی ترهکه؟ ئڕا دی مهردم شاد نیین؟ و لهێ ناکاو د گله ماشین له نوام دهن له یهکهو. د پیاێ تیهنهو خوار. وه خراوهیلنهشووریاێ، یهک شوورن!. هۊچ ئڕاێ یهک نیهیلن! یهکلێان ئۊشێ: ئاخر له کوو بارم پۊل سافکار بێیهم؟ م تهنیا ڕانندهێگم، چوه جواو خاون ماشین بێیهم؟
ئێ قاڵه خهفێد و گشتێ چیمن. نزیک ماڵ لا گرم. له سهر کۊچه. ئافرهت جوانێگ دهس دڕا کهێ ک من و کهسان ترهک ژۊلێگ بنهیمنه دهسێ. چهن گهز نواترهک گووشییهگهم زهنگ خوهێ. ئاقاێ کاندیدا ڕهئێ تواێ. وه خوهم نووڕم. وه نهو پیاێ شواڵ جافی له پا! وه ئهو ڕاننده ک یهێ گوونی خوسه بهێ ئڕاێ ماڵ و وه ئهو ئافرهته ک تمام غوروور خوهێ ناسه ژێر پا تاگهر دهسێ دریژهو بکهێ
یانه بهشێگ له دیمهنهیل ههر ڕووژهێ ئاێهمهیله ک له ناو کرماشان ژییهن. تهنیا کرماشان نییه ک تۊش ئێ گیچهڵه هاتێیه. وه گومانم تمام نیشتمانمان وهێ چۊنه گرفتارن. ئیمه گرفتار سالهیل ناسواویمن.گوڕاێ گوڕ فهقیر ترهکهو بۊمن و فره ترهک چقیهیمن. وهڕاس ئۊیه ڕهئێ دهیدنه کی؟