دادِ ده‌س ته‌نکه‌یل! / کرماشان، گردگ چه‌ورێگ ئڕاێ که‌س نییه / جه‌لیل ئاهه‌نگه‌رنژاد
هه‌رسه‌ێ ئۊشن: «هاز و هێزگرتن، له دڵ گیچه‌ڵه‌یل و سه‌ختییه‌یل، تێده‌و ده‌یشت»، ئه‌مانێ چمانی ئیمه کرماشانییه‌یل، خودا ئڕاێ گیچه‌ڵ و دۊزه‌مه سازیه‌سه‌مان. بیلن بۊشم: فره جار ک توام ژماره‌ێگ له سداێ ئازادی بارمه‌و ده‌یشت، ئه‌ول وژدانما کیش مه‌هه‌ڕ فره‌ێگ دێریم. له یه ک فره له خه‌ڵک تا پووق مل هانه ناو گیچه‌ڵ و درمنه‌ێ و بێ که‌سی و منیش سابل و بابل رووژنامه تیه‌رمه‌و ده‌یشت و ئه‌و چۊنه ک بتوای، ده‌نگ بێ که‌سی و هه‌ژاری ئه‌وان نییم.
گاجاریش وه خوه‌م ئۊشم:هه‌ێ هه‌ێ! ئه‌گه‌ر بنۊسی، ده‌ی له گایله‌گه‌ێ فڵانی!. ده‌نگد وه کوو ڕه‌سێ؟ کی تواێ ده‌نگ ت ئه‌ژنه‌وێ!؟ کی تواێ له شوون قاڵ ت وه داد مه‌ردم هه‌ژار بڕه‌سێ!؟ وه راس هایمنه ناو ساڵ و مانگێ ک نائمێه‌ری، رۊ ئه‌ور پووشاس. چمانێ وه رۊ مه‌ردم، زار و زه‌ۊ ده‌م ناسه‌و یه‌ک.
وه راس مه‌ردم چوه باێه‌س بکه‌ن!؟ ئه‌گه‌ر رووژێار هه‌ر ئێ ساز نامه‌یه بژنه‌ێد و گیچه‌ڵه‌یل خه‌ڵک رووژ وه رووژ فره‌تره‌که‌و بوون، ئایا ئمێدێگ وه زنیانی مینێدن!؟ آیا بانان چرک و زۊخینێگ چه‌وه‌ڕێ مه‌رم نییه!؟ مه‌ردم چه‌و باێه‌س بکه‌ن!؟ هه بنیشن و بۊشن خودا گه‌وراس!؟ وه ڕاس له ناو چۊنه رووژه‌یلێگ، به‌رپرسه‌یل و کاروه‌ده‌سه‌یل ئیمه باێه‌س له خه‌وا بان. باێه‌س بزانن گ خه‌ڵک هه له‌ێوا ده‌س وه بان ده‌س نیه‌نیشێ! خاستر یه‌سه گ ئه‌وانیش ده‌س له بان ده‌س نه‌نیشن.
گرانی، تیه‌ریکی بانان، بێکاری و سه‌دان گیچه‌ڵ تره‌ک پووس خه‌ڵک که‌نییه. کرماشان ئمڕوو له هۊچ ده‌وره‌ێگ وه‌ێ چۊنه تۊش ده‌ردسه‌ر به‌رپرسه‌یل «نه‌تۊیه‌نم» ناتێیه. هۊچ فه‌رقێگ نیه‌که‌ێ چ له ده‌س راسه‌یل بوود و چ له ده‌س چه‌فته‌یل!. خه‌ڵه‌تیان وه ده‌س جناح و گورووهه‌و هۊچ سه‌مه‌رێگ ئڕاێ ئیمه نه‌ێاشتێیه!.
له مه‌رزنشینی، گوله و ژان، له ئشتغاڵ، بێکاری، له سه‌نعه‌ت و پاڵایشگاه، وه تاراج چیین و له خوه‌شییه‌یل عا‌ڵه‌م، زۊخ و دۊزه‌مه کردنه‌سه به‌ش کرماشانییه‌یل. ئه‌مانێگ هه‌ناێ توان شعار بێیه‌ن، کرماشان، پاله‌وانه! قاره‌مانه و …
له‌ێ رووژه‌یلیشه گیچه‌ڵه‌یل عڵاچه‌ۊێگ بۊیه‌سه تۊش مه‌ردم کرماشانه. جناێ پیرووز له بۊنه‌سه د بڕه‌و. بڕێگ هه‌واخواێ به‌رپرس ئه‌رشه‌ده‌و و بڕێگ بۊنه‌سه زز «ئه‌میری» تا ئه‌گه‌ر چه‌رخێگ قه‌رار بۊ بچه‌رخێ، ئه‌و چه‌رخیشه له کار بکه‌فێد و گیچڵ تره‌ک بنیشێده‌و بان گیچه‌ڵه‌یل مه‌ردم.
ئڕا وه‌ێ چۊنه دۊنیمن!؟ فره گرینگه ک بزانیمن ئه‌وانه ک ئمڕوو بۊینه‌سه کاروه‌ده‌س، وه یاگه‌ر له ناو جه‌رخه‌گان رامیاری(سیاسی) گه‌په‌یلێان هه‌واخوا دێرێ، باڵاێ فکرێان، فره به‌رز نییه و چشت فره‌ێگ له ده‌رده‌یل مه‌ردم حالی نیین و هانه شوون په‌چگانی!. چۊ ئاخرقه‌تره‌یل ئاو زنیانی کرماشان په‌چگانی بکه‌ن و له به‌ێن خوه‌ێان بوه‌خشنه‌ێ!.
گورووهه‌یل سیاسی باێه‌س خوه‌ێان ئڕاێ کاره‌یلێ گورجه‌و بکه‌ن ک ئڕاێ مه‌ردم بوو نه له شوون «رانت» فره‌تره‌ک بگه‌ردن و له هۊر مه‌نافه خوه‌ێان بوون. یه‌یشه بزانن ک کرماشان هێن مه‌ردم کرماشانه! نه گردگ چه‌ورێ ک هێن ناخاڵه‌یل سیاسی بوو. مه‌ردم یانه خاس زانن و له هۊرێانه‌و نیه‌چوود.
صدای آزادی / شماره 649