ئاماژه‌ێگ ئڕاێ ئه‌یانه‌یل! / له پرتووک له‌ش شه‌شم / جه‌لیل ئاهه‌نگه‌رنژاد
«کیه‌نیه‌گان رێ که‌ن و کاروان چوو…» ده‌نگ گوورانی‌چڕ کرمانجێگ، کیشێ هات تا ناو خه‌ێاڵه‌یل سه‌ره‌لێ شێویاێ ئێواره؛ له‌ت له‌ت ته‌نیا که‌فتۊم و ده‌نگ کاروانێ، سه‌ر له لیم شێوانۊد. باڵابه‌رزێگ تا سوو ده‌س شه‌و گرتۊد و هه‌ڵپه‌ڕۊد. داره به‌ڕۊیه‌گانیش ده‌س یه‌ک گرتۊن و سه‌ما کردۊن. ئه‌وره ئه‌وه‌ڵ بزمار دنیا داکوتیاۊد. زانسم دنیا بزمار کولێگ و سه‌مات گه‌وراێگه. ئه‌مانێگ له
دنیا ته‌نیا شه‌وێگ تواسم. شه‌وێ گ ناسنامه و پاسپورته‌گه‌م له ناو له‌شه‌یل کۊیه‌نه ئڕام بۊنێده‌و و هه‌ڵته‌که‌نیده‌م له هه‌ر چێ هه‌س…
هه‌ناێ له رووژه‌یل بێ واران هه‌ڵکه‌نیه‌ید و له وێنه‌ێ سڕووکان‌گه‌رده‌یل، منه‌ی خه‌ێاڵ بزمارینێگ له وارانه‌گان پارێ که‌ی، شاهات خوه‌دیش خه‌ێاڵێگید گ که‌سێگ منه‌یید له سه‌ر سڕوکانه‌گان بکه‌ێد!.
شاهات ت ئه‌و چنجگ نیه‌زانمه‌یده گ له ناو ئه‌و سه‌ماته جه‌ژن وه دی هاتند گرن و تنیش سه‌ر، به‌رز گرید و چه‌وه‌یل دڵد له هۊچ خه‌مێگا لاوا نیه‌که‌ێد و په‌ل کیشید و په‌ل کیشید و باڵه‌وازی که‌ێد و نیه‌زانید هایده ناو سڕ سه‌مات بێ هچانێگ…
م له خوه‌م ئه‌ژنه‌فتمه ک شه‌وه‌کیانه‌یل وه‌یل، ده‌ڵقه‌گان، ئاێه‌مه‌یل بێ‌سه‌ر فره‌ێگ ده‌نه ماشینێ گ «سڕ سه‌مات» کووه‌و که‌ێد و به‌ێده‌ێان تا جمهووری سڕووکانه‌یل گه‌ورا. له کرماشان، هه‌ولێر، قاهره، له‌نده‌ن یا هه‌ر جاێگ تره‌ک.
هه‌میش له خوه‌م ئه‌ژنه‌فتمه ک رووح ئاێه‌مه‌یل، کیشێ تێ!. یانێ شاهات فره که‌س مردنه؛ ئه‌مانێگ رووحێیان هه‌ێمان باوه‌ڕ نه‌کردێه!. ئه‌وڵ رووحه‌یل ئاێه‌مه‌یل دنیاێا په‌ێوه‌ندی دێرێ. به‌شێگ له رووح ئاێه‌مه‌یل؛ ک ئاێه‌مه‌گان، خوه‌ێان له لێ بێ‌خه‌وه‌رن!.
شاهات تنیش مردیده!. گوله داسه لید. له‌شد که‌فتێه‌سه وه‌ر مرداره‌یل. مرداره‌یل تا سوو له سه‌ر له‌شد، چه‌قه‌ێان تێ! گووش بته‌کن!. …
شاهاتیش له دۊیاێ هه‌ڵبژاردنێ گ له سندووقه‌گان، که‌مچگ فره‌ێگ که‌فێده ده‌س خاونکاره‌یل، وه تیر خه‌ێو دیکتاتورێگ له ناو شه‌قامه‌یل چووڵ کوشیایده‌و هه‌ێمان مرداره‌یل، نه‌ینه‌سه‌ده‌و.
یاگه‌ر له چێاگان بێ که‌ور رمیایده و بۊده‌سه به‌ور. گورگ و چه‌غه‌ڵ له سه‌ر له‌شد شیتاڵ یه‌که‌و بڕن و نیه‌زانم مێژگداند ها له ده‌ر که‌ڵاوه‌ێ کام چه‌تاڵ؟ چه فه‌رقێ که‌ێ؟!
له‌شه‌یل، چۊ که‌لاوه مینن. ئاێامه‌یل، فره ساڵ وه یه‌کێگێیان عاده‌ت که‌ن و مینن و مینن تا خوه‌ێان بوونه له‌ش به‌ش مردێیگ له‌و که‌لاوه. که‌م که‌سیش هه‌س بومب بوه‌سێده خوه‌ێه‌و و خوه‌ێ بتووقنێد و هه‌ر چێگ کۊیه‌نه‌س له ریشێ هه‌ڵته‌کنی.
کی ها گووش!؟ نیه‌زانم! گوورانی‌چڕ کورمانجێگ خوه‌نی و خوه‌نی!: «کیه‌نیه‌گان رێ که‌ن و کاروان چوو…» منیش چۊم!. له‌ێره نه‌ۊم. ئه‌مانێگ ئه‌ژنه‌فتم؛ واران هه‌ڵکه‌نۊده‌م. چمانێ رووحێگ بۊم. رووحم کیشێ هات. خوه‌م نه‌زانسم. دنیا دریژه‌و بۊد و که‌متارێگ له سه‌ر سه‌ف وساۊد و چه‌وێگ داچه‌قانۊد و منه‌ی له‌ش کرد.
یه‌کێگ وه‌ت: زانی رووحد کیشێ تێ؟. مردیده و ته‌نیا به‌ش شاردیاێ رووحد له لێ خه‌وه‌ر دێرێ؟! مامووره‌گان له شووند گه‌ردن؛ ئه‌مانێگ له‌ش له‌ش، جی ئاڵشت که‌ید و ئێرنگه هاتیه‌سه له‌ش شه‌شم. دنیا هه‌ێمان کیشێ تێ…
جه‌لیل ئاهه‌نگه‌رنژاد. پایز 1400 کرماشان