تا دۊننەت ئێ مەردمه ڕا «نام خودا» کەن؟ / چه‌ن شێعر له مووسا ئه‌مایی
1
ڕا عشق وتم خڕ نەخوە دەورم ک م دانام
دیمەت وە دڵم بۊت و منی ئێ دڵە دانام
تا ناتمەسەو جی تو ئڕا چیتە ڕێیەو هەم؟
ئەر ئێقه خوسەت دیایگ دە م بۊشە م تا نام
دە لا م نیەوێرن وە خوویی نام تو بیارن؟
ئێگل تو چڕیتەم هە دە لای کول کە وە لانام
تا دۊننەت ئێ مەردمه ڕا نام خودا کەن؟
ئەو رووژه ک دیمەت وە خودا دڵ دە خودا نام
ئێ جاده ک عشقه هە تیەریکە و هە وەفر دیای
خوەر هەم بۊە شوون‌گوم م ئڕا دەی رێیه پا نام؟²
ئەر شێعر وتم شێعر وتم ڕا یەسە بیایەو
ئێ چەن گله بەیتەیشه نە ڕا نانە نە ڕا نام
ئێ قەڵبه شەوارێگە ک هەرچگ خەمە خەم دەێ
ئێ عشقه قومارێگە ک هەرچگ هەسە دانام
2
بۊمه کەس کول‌کەس و کەسێ کەس خوەم نیه
رەفیق ئەسرەیل م بێژه ده‌س خوەم نیه
تام ژیان ها وە ژان، خەم و تەم و زام و زۊخ
نەو وە شەریک خەمم یانە بەس خوەم نیه
نە! ناڕەحەت دەت نیەوم، دەس نەیه نام دەسێ
هەی پەل ئەسره‌ی ک چوو، یەی وە دەس خوەم نیه
خەم تن و دەرد ئەیو، خوسەی تن و داخ یا
بۊمە شوان ریەنی، ک دەی پەس خوەم نیه
خوەتان وە زامەت نەخەن تا م ده فکرێ درام
هۊ(چ) ئاسمانێ ولا، چۊ قەفەس خوەم نیه
ئڕا دڵ داڵگم زینگم و ماگەسەم
هە یە ک هە دیایگ و چوو، یەی نەفەس خوەم نیه
3
دەنگت بێیارێگ و ئەسڵ دەنگ نەکەی
بداونێگەت وە سەر و لەنگ نەکەی
ئاهۊِ خوەت وەرد روویی بۊنی و
تفەنگ دە لاتووگ و پڕێ شەنگ نەکەی
دڵت تەنگوو ڕا دیینێ ئوو نەچی
تا دە دڵێ جای کەسێ تەنگ نەکەی
شەو دە دەنگِ خوەشِ خەنگەیلێان
ئەسر خوەت ئەوبشاری و دەنگ نەکەی
ئاوِ ڕەنگ خوەت ڕەینِ خوەت بکە و
چۊ من ساده کەسِ تر ڕەنگ نەکەی
بۊمە وە باوگێ کل رووڵەێ بکەێ
بچوو! وەلێ وەرد کەسێ جەنگ نەکەی