شێعریگ له کتاو لهش شهشم / جهلیل ئاههنگهرنژاد
له وهفرینهگان ک دهرچیمن، چیمن
پاسپورتهگهد ئۊشێ:
نەفەرێگ بۊدە
لە رووژهەڵات ناوەێن
تەنیا
باێهقوورهتقژ رەنگینەگەێ
سەر مەزار ناسێدەد و
تەنیا رووژنامەفرووشەگەێ
باژار نیمەرودۊیاێ تهنیاێگ
له ناونکی خهێاڵ فڕووکهێ مهرگ!
ئۊشێ:
دنیا تەنیا دو رووژ قاپد گرتۊد و
مەرگ
لە ناو لەش شەشم
شهکانۊدهدهو! شهکانۊدهدهو!
وڵکەرد نەۊ مهرگ!
له سهر ههر پاراگرافێگ
له مشت ههر جومڵهێگ،
پرسیاریێگ وساۊد!
ت باێهس وه کووڵ شبهـجومڵهێگهو بۊیاتاید و
کوڵبهرێگ
وهرهو ئێوارهێ نهفتهگان بوردیاتادهد
ت باێەس فرەتر بچیای
فرەتر کیشد باتاد
کیشد باتاد تا فهلسهفه
تا ئێوارێان کتاوهیل تێژ
فرهتر دریژهو بۊیاتیاید
فرهتر لاپهڕه بێاشتاید
پاد بڕەسیاتادە ئەوەڵ پاڕنگەێ رووژ
له خوەرهڵاتەیل بەیرووت!
نە! نه!
وەتن وەرەو بەیرووتیش مەچن
ئەمانێگ هەرشەو
لبنانیێگ لە لیم پەڵپ سێف گرێ
نیەزانم لەورە خەوەیل خەڵک
هەێمان بوو بالۊت دەن؟
بوو شهقارته؟
تام سێف؟
تام چەوەیل شەڕانچیێد؟
رهنگ گوڵ سوو؟
یاگهر لەشهیل تازەترێگ هانه ڕێ؟!
***
ههێمان له ناو چهمهدانێگ
له جادهیل برێندار رووژهڵات ناوهڕاس
جۊلهێ ماموورێگ تێ
هاێ هاناڕهسهیل!
مهرگ وه کراوات سییهێگهو
پهنج لهش له شوونم هاتێیه!
پهنج لهش!…
زمسان 1399