سداێ ئازادی ده‌نگیگ ئڕاێ مه‌ردم / ئه‌شکان میری
ڕووژنامەیل و چاپمەنەیل وە دریژاێ دیرووک شارسانیەت تەمەن دێرن، جوورێ گ لە دەوران ڕۆم مێژوویی بۊە بەشێگ له ژیان ئاێەم.
ئێرەنگە ئی هەڵکەفت پەیوەندیه؛ له بوارەیل فرەێگ جوور سیاسەت، کولتوور، ئابووری(اقتصادی) و… پێش کەفتێەو بەش فرەێگ لە مەردم هەر ڕووژ چەن دەقە تا چەن سات گەرد نەشریات دەنەو سەر.
وە دڵنیاوە تۊەنیم بۊشیم هەرچەن تکنولوژی تۊەنستیه دەسەڵات فرەێگ لە سەر دونیا داشتۊد و بەشتیل فرەێگ له ژیان ئاێەم ئێمڕووژی بگۆڕنێد
وەلێ هێمان نەشریات و ڕووژنامەیل بەش قورسێگ له ژیانەوەی مەردم ئی ڕووژگارە دێرن ک فرە کەس باوەڕێان ئیەسە بێ ڕووژنامەو ڕەسانە نیەتۊەنیم ژیان بکەیم.
لە ساڵ ۱۲۷۷ هەتاوی ک یەکمین ڕووژنامەێ کوردی وە ناو “کوردستان” لە قاهرە بەڵاو بۊ، تا ئیسه چەندین گله ڕووژنامە وە زوان کوردی له وڵاتەیل دونیا دێرن چاپ و بەڵاو بوود ک تۊەنستنە له زانیاری بەخشین وە وەردەنگەیل خوەێان نەخش بێ وێنەێگ داشتۊن.
ئێمساڵ ئێمه له کرماشان ساڵڕووژ وە دی هاتن تەنیا نەشریەێ دو زووانەێ، هەفتەنامەێ “صدای آزادی”، جەشن گریم ک تۊەنستێه لە هەژدە ساڵ تەمەن خوەێ، وە هەر دو زووان کوردی و فارسی جێ پاێ خوەێ لە کومەڵگاێ مەردم کرماشان لە تەمام بوارەیل وە تاێبەت هونەر و فەرهەنگ واز بکەێد.
لە ڕووژەیلێ گ زووان و فەرهەنگ ڕەسەن ناوچەێ کرماشان وردە ورده وەرەو لە هۊرەو چین چوود، وە بێ گومان “صدای آزادی” هەمۊشە هەوڵ داس هاوڕێ و هاو زووان مەردم ناوچەێ کرماشان و لاێنگر حەق ئێ مەردمه بوود .
نیشان داس هەناێ ک تۊەنیمن ئەڕا زانیاری بەخشین تەقەلا بکەیم، تۊەنیم ڕەسەنایەتی و فەرهەنگ خوەمان لە هۊر نەوەیمن و قسەیلمان وە زووان داڵگی بکەیم، ک نە تەنیا وەردەنگەیل له خوەندنێان حەز بوەن بەڵکەم قسەیل زانستی و علمی فرەێگ بکریەید.
بێجگە له زانیاری بەخشی و شیەو کردن بوارەیل جیاواز، ئێ هەفتەنامە هەرساڵ گەرد خەڵاتەیل ئەدەبی و هونەری خوەێ پشت گیر قورس و ڕچە شکن وە ناو بانگێ، ئەڕا هونەرمەندەیل وە تاێبەت جوانەیل بۊە ک دڵخوەشی گ بوود ئەڕاێان ک خزمەت و هونەر و کوومەڵگاێان لە هۊرەو نەوەن.
بێ گومان کار خاس له هۊر کەسەو نیەچوود و لە دونیاێ گ تکنولوژی وە تونی پەێوەندیەیل ئاێەم وەرەو نووا دەڵەک دەێد.
نەخش ڕووژنامەیلێ ک خوەێان قسەێگ ئەڕا وەتن دێرن و وەتار و ڕاێ خوەێان ئۊشن، جێ بێ وێنەیگ له ناو کومەڵگا و ڕووشن بیرەیل دێرن ک هەفتەنامەێ “صدای آزادی” یەکی لەو تاکە ڕووژنامەیل ئێمڕووژ کرماشانە ک هیواداریم چراخ ئی ماڵە ئەڕا هەمۊشە ڕووشن بوود.