پا دامه‌سه‌ گه‌ز ک نه‌شکنێده‌م داخد / چه‌ن شێعر کوردی له‌ ئه‌مین شێرزادی

 


گیریی و خه‌نین ت له‌ هۊرم نه‌چێیه‌
موور تن و شین ت له‌ هۊرم نه‌چێیه‌
یانه‌یشه‌ ئه‌گه‌ر بچوو له‌ هۊرم، هه‌رگز
تام تیه‌ڵ چێن ت له‌ هۊرم نه‌چێیه‌

***

ئێ دۊد و ده‌مه‌ هناسمان شارییه‌سه‌و
خاس و گه‌ن و چه‌فت و ڕاسمان شارییه‌سه‌و
به‌و تا ک بچیمنه‌و ئڕاێ ئابادی
ئێ شاره‌ پییایل خاسمان شارییه‌سه‌و

***

واران ک له‌ ناو دڵم ئاگر کرده‌و
له‌ ماڵ خراو دڵم ئاگر کرده‌و
ده‌س دا ده‌س ئاگر و ڕمان ماڵ دڵم
ئمجا وه‌ حساو دڵم ئاگر کرده‌و

***

چۊ تیخ و قه‌ێاره‌ هه‌نجنێده‌م داخد
گیانم سزنێ داڕزنیده‌م داخد
ئه‌ما وه‌ سه‌ر ته‌مام ئێ ده‌رده‌یله‌و
پا دامه‌سه‌ گه‌ز ک نه‌شکنێده‌م داخد

***

نه‌ ئاو و نه‌ نان خوه‌م سه‌رم ده‌ێدنه‌ بڕ
نه‌ تیخ زوان خوه‌م سه‌رم ده‌ێدنه‌ بڕ
هۊرم فره‌ ها زوانمه‌و چۊن زانم
ئێ شێعره‌ وه‌ گیان خوه‌م سه‌رم ده‌ێدنه‌ بڕ

***

وێران بۊیه‌ حاڵ ئێ خێاوانه‌یله‌
ئاگر چێیه‌ ماڵ ئێ خێاوانه‌یله‌
ت چیدن و ناتید و له‌ شووند هه‌ر شه‌و
خۊن که‌فته‌ خێاڵ ئێ خێاوانه‌یله‌

***

یه‌ێ شه‌و له‌ شه‌واره‌یل وه‌هاران به‌سمه‌
ت بۊدن و ده‌م ته‌قه‌یل جاران به‌سمه‌
مشتێ په‌ته‌سوو له‌ گیان من مه‌ن بێ ت
جوور خوه‌ڵه‌کوو یه‌ێ نم واران به‌سمه‌

***

نه‌ شه‌و مه‌ن و نه‌ خێاڵ ڕووژێگ ئڕام
نه‌ له‌ سه‌ر شیر نۊر تووزێگ ئڕام
ت چیدن و ئاسمان وه‌ ئێ گه‌ورایه‌
بێ ت بۊیه‌ قه‌د سوو گونووژێگ ئڕام

***

چۊ ماسیی ناو حه‌وز کاشی دڵ م
پڕ بۊ له‌ خێاڵه‌یل نه‌قاشی دڵ م
ت مانگ و په‌ری شه‌وه‌یل من بۊد و ئڕاد
هه‌ر چێ سه‌ر بێ ئاوه‌ تراشی دڵ م

انتشار در هفته نامه صدای آزادی / شماره 622

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *