من چیم ئه‌ویست له نیشتمان / جه‌لیل ئاهه‌نگه‌رنژاد
ئڕا هه‌ر گیچه‌ڵێگ ئه‌ڵکه‌فێ، فره له خه‌ڵک کلک دڕا کهن ئڕاێ کاروه‌ده‌سه‌یل بان؟! ئڕا کوومه‌ڵگا تۊش گوسه‌ڵه‌یل قۊل و بنه‌ڵبن هاتێیه؟! ئڕا که‌سێگ ئڕاێ بانان نزیکیش حه‌تا چه‌وه‌ڕێ ئۆمێد و خوه‌شی نییه؟! ئڕا که‌سێگ وه هاتن و سه‌فه‌ر سه‌رک وه‌زیر و وه‌زیر و خوار و بانێان وه پاریزگاگان دڵخوه‌ش نیه‌ود؟!
شاهات ساده‌ترین جواو وه‌ێ پرسێاره‌یله، یه‌سه: بێکاری و فه‌ساد و ته‌وه‌ڕم هه‌وسار بڕینه و هه‌ر کام له یانه تۊیه‌نن گوسه‌ڵه‌یل تره‌ک بچه‌کنن و ده‌یشته‌ێ ئه‌من و ئارام کوومه‌ڵگاه گوڵه گوڵه له یه‌ک بچه‌کنن و سه‌قام له ولات بسێنن.
له ئێوارێان تیه‌ڵێگ له سڵتان سه‌نجه‌ر پرسێار کهن: ئڕا که‌فتیده ئێ رووژه؟! جواو ریکێگ ده‌ی. ئۊشێد: ئه‌ێه‌مه‌یل بۊچگ نامه بان کاره‌یل گه‌ورا و ئاێه‌مه‌یل بگه‌ورا نامه شوون کاره‌یل بۊچگ. گه‌وراگان شه‌رمێان هات کاره‌یل بۊچگ بکه‌ن و ئاێه‌مه‌یل بۊچگ ده‌رقه‌وه‌ێ کاره‌یل گه‌ورا ناتن. هه یه بۊ گ له‌شکه‌ری و کشوری فاسد بۊن»
خاس زانیمن و زانین گ سیاسه‌ت غه‌ڵه‌ت، فره له خاسه‌یل زه‌مانه نیشانه بن ماڵ تا نه‌تۊیه‌نمه‌یل کار بگرنه ده‌س. هه‌ناێ کاروه‌ده‌سه‌یل خوارین و ناوه‌ێن، له «ئلیت» کوومه‌ڵگا نه‌ون، حه‌تا له خوارترینێان وه حساو بان، «کاروه‌ده‌سی» و «کارمه‌زرنی» وه عۆنوان دڵنگ کۊیه‌نه وه پێ تێد و له هۊچگامێان کار ئسۊل نیه‌ود. چۊنه مودیرێگ نیه‌زانێ چۊ کار بکه‌ێ؛ نیه‌زانی چۊ گیچه‌ێه‌یل له وه‌ر پاێ خه‌ڵک بسڕێده‌و؛ نیه‌زانێ سانێگ له وه‌ر پاێ خه‌ڵک لاوه‌ێد؛ نیه‌زانێد ده‌روه‌چێگ ئرای بانان مه‌ردم بچه‌کنێد. خه‌ڵک که‌فێده ناچاری و چاره‌ێگ ئڕاێ دلیمه‌یل بانانێ نیه‌ۊنێدنه‌و. له ئێ وه‌خت و کاته‌سه گ کلک وه‌ره‌و بان دڕا که‌ێد و تواێ هاناێ خوه‌ێ و بانه‌بانه‌گان بڕه‌سنێد.
هه‌ناێ سه‌ر مۆدیر و کارمه‌زرن بێ کڵاو مه‌ن، ئه‌وه‌ڵ گوسه‌ڵ له به‌ێن خه‌ڵک و ده‌وڵه‌ت تێده دی!. ئێ گوسه‌ڵه مه‌خش کوومه‌ڵاێه‌تی شه‌ق‌شه‌قه‌و که‌ێد و له دۊیاێ یه، گیچه‌ڵ له پشت گیچه‌ڵ قتاره به‌سێ. حه‌تا ڕمیان یه‌ێ ماڵێگ بووده ده‌سپێچگ ئڕاێ ئعتراز!. تا زه‌خمێگ که‌فێده‌و ده‌یشت، هزار زه‌خم کۊیه‌نه و نوو سه‌ر درارن و خه‌ڵک سه‌ر نه‌ێده شه‌قامه‌یل بێ بن و هاوار که‌ێد. گه‌پ ئابادان ئمڕوو به‌ش بۊچگێگ له ئێ گه‌په‌سه. له وه باێه رخ بچوو گ ته‌قه‌ێ تره‌قه‌ێگیش هاوار خه‌ڵک بڕه‌سنێده ناو شه‌قامه‌گان.
خه‌ڵک له ده‌وڵه‌ت چوه تواێ؟! شاهات ساده‌ترین چشتێ گ هه‌وه‌جه‌ێ بوو له که‌ڵام «شێرکو» نه‌مر هاتێیه: «من چیم ئەویست لە نیشتمان؟ / جگە لەوەی کە نانێک و / کە کونجێکی دڵنیایی و / گیرفانێکی بە حورمەت و / مشتێ هەتاوی ئارام و / بارانێکی خۆشەویستی و / پەنجەرەیەکی کراوەی سەر ئازادی و عەشقم / باتێ من چیم ئەویست لەوە زیاتر و نەیدامێ! / بۆیە ئیتر نیوە شەوێ دەروازەکەیم شکاند و /چوومە دەرێ / بە ئێگجاری چوومە دەرێ!»
وه ڕاس یانه ساده‌ترین دڵخوازییه‌یل مه‌ردمن! ئه‌مانێگ ئڕا هه‌ر یانه‌یشه دچار گیچه‌ڵ بۊنه؟ یه‌سه گ ئمید وه بانان بۊیه‌سه په‌ڕوو واڵێ گ له وه‌ر خوه‌ر داڕزیاس. کارمه‌زرنه‌یل! وه‌ختێه خاستر بنووڕین و هۊرده‌و بۊن و زه‌خمه‌یل دڵ مه‌ردم بۊنین و فکر ئه‌ساسی بکه‌ین. خه‌ڵک له ئێ هه‌مگه ساڵه نیشان دانه به‌رده‌یل و گیچه‌ڵه‌یل فره‌ێگ له نیشتمان له هۊره‌و بردنه و هاوڕێدان بۊنه. نۊسان له ئیمه و خوه‌نین له ئۊیه…
سرمقاله صدای آزادی / شماره 642