خوەرئڵا تەنیا،ها مەتەڵ جاران نەنگم / چه‌ن شێعر له‌ مێهرداد زیبایی

 

1

هێمنی

کڕ دماێن ماراتۆنەو

ڕێگاێ،ڕاخێز داخەو

جسنێ،شاوەت سەرکوتیاێگه ک

سەرچەمەێ ها وەیشت بێاوان عەرەبسان.

تنی پاد پەتیەو زام

هەێ ژن ژانەیل هەمیشان.

بمرم

ئڕا وەختەیل سکۆن پڕخووفێ

که من پیا هامه وەراێوەرد؛

یه گەێ ئاخریەک کوناواجەیل،

یه نام ئوتاق نمرچین کاروەدەس ئێدارەێگ،

یه حەێن وڕامەێ بکەو نەکەێ شێخ ئایین،

یه لایک وتار پۊچەڵد یە دنیاێ مەجازی

یا فیشتر،

گووش تەکانن ماموساێ گەڕاێ

وە شێعرەیل پڕاوپڕ پەژارەید.

بمرم

ئڕا ڕێخەیل داخ هەوەجه

یە ژێر تۆقاوڵەیل پاد.

هەێ ژن ژانەیل هەمیشان؛

جاکەشتەرین وشەێ نام وشەنامەیل؛

“هەوەجەس”.

2

زەمان

کوورای گردێە

خوەر سەرزەمینم

ڕێ گوڵ بەێان گۆم کردێەو

ماواێ ها ئاسو تیەریکان،

سوواێ ساڵحان سەراوەنۊنەو

خوەرئڵا

تەنیا،ها مەتەڵ جاران نەنگم.

خوەرئاوا

چاڵاک چەک و زیلەێ دەم چەم ژیانه؛

ئازادی،پەلەتن ها ملێو

پیتەخەنەێ سەگەیل ئەزرەتمەن چەپاڵێ نانه،

عشقیش،یه دریژای تن خەێز ناکەسەیل

کیشیاسەو دارو

لەشێ ها دەم منگاسەیل سێ پوش دژ واێ شەماڵ.

ئاااااخ

سوواێ ساڵحان

دیارد نیە

خاڵخاسان،گیرودەێ خوەرئاوان.

3

یه وڵات م

ئەسیری؛

شتر هەراێهەری یەێ گەرێگەو

ژێروان چرکەدڵێ یه خوری ستەم

ها قۆل میشتێ

تا بخەفێ

یه دەر ماڵ

سەرجەم،هام وڵاتیەیلم.

 

4

رەفیق مەێواق،سان سەردسڕ

ئیسفا بگر

مەس شینه

سێرپڕە

وەخته هق بکریاێ کوواێ کوو زام هەفت نیشتمان

یه هڵقوم لەش وڵاتێ ک وە تێخ ستەم ناوکەبڕ بۊە.

نەیدە؟

هەفت پیاو هەفت ژن

وە هەفت سازو هەفت دهڵ

یه هەفت دەورانو هەفت روژگارە

یه هەفت وڵاتو هەفت ئاسمان

رووح وەیلانێ وە چەمەری چریکەکەری

خسنەسەو چوپی؟

رەفیق مەێواق،سان سەردسڕ؛

ئاگر ئێ وڵاته

دوزەق هەفت دنیاس

ک ها ژێرسەر هەفت هۊهاێ هەفت سەر.

مەگەر

یەکیەتی هەفت خوداێ هەفت ‌نیشان

یه دڵ هەفت پیاو هەفت ژن هەفت دڵ

چارێ بکەێ…

5

نه خۆرماێ بەسرە

شیرین کرد کام ناکام حەقاێەتی

 

نه ئەنجیر ئزمیر

هاز دا وە گیان بێ نز ئەوین

نه هەنار ساوە

داکوژان،تین دڵ دەسەبرای

نه هەنگۊر ئوورشەلیم

مەسی جمان

وەرەو ڕەگەیل نقۊڕ شایی

نه زەێتون نابڵۆس

چەور کرد پووس پاسرکیاێ ئمێد.

میوەێ بەهەیشتی

خەڵات کام پەێخەمەرە

یه خوەرئڵاێ نامنێ ک “قەرژیەڵک”

تەنیا مەۆنجز هەراێهەری پەیخەمەرەیل شیرین زووانێه؟

6

بووڕنەو

دارسان دارەیلێ که

هانه زاوزێ لاپەرەیل پاڵپیشت ئازادی

بشکنن

قەڵەمەیل یاخی پەێجوور حەق

هشک بکەن

دەریاێ مرەکەوێ که

ماواێ بەراێبەری بنکول لانەمایل ئاوزێه.

چنگچاردان

ئڕا سێفا چەس؟

نه مەوڕیاێ

نه مەشکێ

نه هشکه مەو.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *